Usban og pilde
CEBU, Philippines - Managkaribal nga Southwestern University-Phinma Cobras ug University of the Visayas Green Lancers mobaktas og managlahing dalan sa pagsugod sa ikaduhang hugna sa eliminasyon sa 16th Cebu Schools Athletic Foundation, Inc. men’s basketball tournament karong adlawa diha sa Cebu Coliseum.
Ang duha ka higanteng koponan bag-o lang nag-abot gikan sa eksplosibo nilang sangka diin ang Cobras maoy midaog sa iskor nga 65-57 niadtong Huwebes sa gabii.
Nagsolo sa liderato bitbit ang 6-0 nga baraha, ang Cobras nagpanikad nga padayonon ang ilang pagratsada sa dihang ilang harungon ang defending champion University of San Carlos Warriors sa alas- 5:30 sa hapon, samtang ang Lancers nanghinaut nga makabawi dayon gikan sa miaging kapildihan sa ilang pakighamag batok sa Cebu Institute of Technology-University Wildcats sa alas-4 sa hapon.
Pareho sab sila nga naglaraw nga usban og pilde ang tagsa-tagsa nila ka mga kaatbang. Ang Cobras mipakaging sa Warriors, 68-54 niadtong Agosto 6, samtang ang Lancers midemolis sa Wildcats, 69-48 sa susamang adlaw.
Gumikan sa kahadlokan nilang line-up nga giapilan pa og kilas nga mga rookie players, inilog kaayo ang Cobras ug ang Lancers, apan dili sila angayan nga mokompiyansa kay seguradong buhaton man sa Warriors ug Wildcats kutob sa ilang mahimo aron makapasol og dagkung isda.
Sa juniors division, usa ka dumot nga sangka ang gipaabot tali sa three-time defending champions Sacred Heart School-Ateneo de Cebu Magis Eagles ug UV Baby Lancers sa alas-2:30 sa hapon.
Bitbit ang 5-1 win-loss record, ang Magis Eagles mopahugot sa ilang kampanya nga makaangkon og awtomatik nga luna sa semifinals, samtang ang Baby Lancers naglantaw sa ikaupat nilang daog sa lima ka duwa.
Sa pasiunang duwa sa ala-1 sa hapon, ang University of San Jose-Recoletos Baby Jaguars tinguhang inaton ang ilang 3-2 nga marka sa dihang ilang hamagon ang University of Southern Philippines Foundation Baby Panthers nga bag-o lang miputol sa upat ka sagunson niining pilde pinaagi sa kulbahinam nga 67-66 nga kadaugan batok sa SWU-Phinma Baby Cobras. (BANAT PALARO)
- Latest
