Allied Army blue, Gallego nagsawo sa liderato sa Triple-A summer league 2016

CEBU, Philippines - Temporaryo karong nagsawo sa liderato ang Allied Army Blue ug ang Gallego human sa malampuson nilang kadaugan batok sa ilang tagsa-tagsa ka kaatbang sa Triple-A Summer League 2016 niadtong Domingo didto sa Kimwa gym sa Subangdaku, Mandaue City.

Ang Allied Army Blue mipahamtang og laing pilde ngadto sa Larrobis sa low scoring ballgame, 43-34, samtang ang Gallego mipilde sa Monterroyo, 63-54.

Ang duha parehong nagbitbit og 3-0 nga baraha.

Sa gihapon, ang presidente sa Triple-A nga si Gilbert Lesin maoy nangu sa ataki sa Allied Army Blue nga mipabuhagay og 13 puntos, diin 10 niini iyang nahimo sud lang sa first quarter. Mipakita sab og maayong labok si Barak Recto nga mikadlit og 12 puntos.

Si Raymundo Carvajal mao lang ang bugtong scorer sa Larrobis nga miiskor og double digits pinaagi sa iyang 16 puntos.

Sa laing bahin, sila si Tawing Grafe ug Rey Gonzaga nagkumboya’g 29 puntos aron mangu sa opensa sa Gallego nga nakabangon human gilubong sa first quarter, 7-20.

Nakan-an ang labaw paghuman sa third period, 37-49, apan pag-abli sa fourth quarter gipabuthan dayon sila og 3-point shot ni Gonzaga nga maoy miduslit sa mainitong rally sa Gallego hangtod naangkon ang daog.

Gipangulohan gihapon ni Mai Suson ang Monterroyo nga mipabuto og 22 puntos, gisundan ni Jimmy Monternel sa iyang 10 puntos.

Sa pasiunang duwa, ang D’Lurics mikulit sa ikaduha nilang daog pinaagi sa pagpukan sa team Tagalog, 64-58.Si Rex Gonzaga  maoy mibagnos og maayo sa D’Lurics aron moiskor og 22 puntos.

Sa laing bahin, ang Triple-A family mihatag sa mainiton nga pahalipay ngadto sa usa sa ilang miyembro nga si Dandy Tagalog, kinsa misulod na sa sag sa kaminyuon uban sa iyang hamiling kapikas nga si Liezel niadtong   Hunyo 10 didto sa Paradise Garden Event Pavillion sa Canduman,  Mandaue City. (BANAT PALARO)