'Free agency' wa pa sa huna-huna ni Durant

CEBU, Philippines - Mikompisal si NBA star Kevin Durant nga padayon pa niyang gihinuklogan ang kaparotan sa Oklahoma City Thunder ngadto sa Golden States Warriors sa bag-o lang natapos nga Western Conference finals mao nang wala pa mosantop sa iyang alimpatakan ang umaabot nga free agent market.

Ang Thunder nagdanga-danga na unta sa labing una nilang pagsud sa NBA Finals sud sa upat ka tuig human miposte og 3-1 nga bentaha sa serye, apan kalit lang silang mikolapso hinungdan nga gisagunsonan og tulo ka pilde sa madasigon nga Warriors ubos sa pagpangu ni back-to-back MVP Stephen Curry.

Matud pa ni Durant nga nagbalik lantaw siya karon sa ilang season mao nang wala pa siya maghuna-huna sa laing mga butang.

Ang 27-anyos nga si Durant mao unya ang labing init nga player pag-abli sa free agent market karong Hulyo 1.

Lagmit ang karibal nilang Golden State Warriors ug San Antonio Spurs ang mosuway og bira ni Durant gumikan kay pareho man kining makasarang og tanyag kaniya og maximum contract nga mobalor og $111 million sud sa upat ka tuig.

Hinuon, ang Thunder makatanyag og $149 million sud sa lima ka tuig kun ugaling gusto nilang ipabilin  ang ilang superstar. (BANAT NEWS)