Enriquez, Fiel daog; VMA Power chess sugdan na
CEBU, Philippines - Gisaw-an ni National Master Rogelio Enriquez ug Percival Fiel ang dungog sa May edition sa binulan nga torneyo sa Cebu Executives and Professionals Chess Association niadtong weekend didto sa Robinsons Galleria Cebu.
Sila si Enriquez ug Yves Fiel parehong mitali og 7.5 puntos, apan si Enriquez maoy mipatigbabaw sa Group A gumikan sa simple tie.
Mitapos sa ikatulong puwesto si Rosendo Yamyamin uban sa iyang 6.0 puntos. Bisan pa man niini, miabante gihapon siya sa grand finals gumikan kay si Enriquez ni-qualify na man uban nilang Amado Olea, Jojo Moralla ug Peterson Sia.
Sa Group B, si Percival Fiel ug CEPCA President Jerry Maratas nagtabla sa iskor, 4.5 puntos, apan si Fiel maoy naghari gumikan sa mas taas niining superior tie-breaker.
Gumikan niini, si Fiel nakigduyog nilang Bong San Pascual, Romy Pialan, Ruel Hortelano ug Maratas sa “Battle of Champions” karong Disyembre.
Sa laing bahin, ang 4th VMA Power Open Chess Tournament mosikad na karong adlawa diha gihapon sa Robinsons Galleria.
Ang duha ka adlaw nga torneyo nga gipaluyohan ni CEPCA Vice President Engr. Marvyne Guardiana mitagana og P25,000 nga ganti sa mga mananaog diin ang makampiyon mobulsa og P7,000. (BANAT NEWS)
- Latest
