Solong liderato laraw sa Worthy-UV
CEBU, Philippines - Magsolo sa liderato maoy laraw sa Worthy-University of the Visayas Green Lancers sa ilang pakigsangka batok sa Mighty Sports/University of San Jose-Recoletos Jaguars sa 8th Cebu Schools Athletic Foundation, Inc. (CESAFI) Partner’s Cup karong adlawa diha sa Cebu Coliseum.
Lab-as pa gikan sa duha ka sunod-sunod nga daog batok sa Cebu Landmasters/University of San Carlos Warriors ug Tyron Properties/University of Southern Philippines Foundation Panthers, ang Lancers nakigsawo pa karon sa liderato uban sa Phinma/Southwestern University Cobras sa managsamang baraha nga 2-0.
Si coach Gary Cortes magsandig na sab nilang Rey Suerte, Josue Segumpan, Michael Macion, Jason Balabag ug Jerome Napao sa tinguha nga protektahan ang wa’y mansa nilang rekord, samtang ang Jaguars maglaum nilang Jaybee Mantilla, Ralph Dinolan, Jiguel Gastador, Ricky Peromingan ug Nelvin Navarra aron mopabangon kanila human masugamak sa mga kamot sa Phinma/SWU.
Sa pasiunang duwa, ang Warriors ug Highlands Corned Beef/University of Cebu Webmasters naglaraw nga buakon ang 1-1 nga panagtabla nga naghigot kanila uban sa Jaguars ug My Led Opto/Cebu Institute of Technology-University Wildcats. (BANAT NEWS)
- Latest
