Monterroyo mipukan sa Villalon sa Laba Tourney

CEBU, Philippines - Gipakgang sa team Monterroyo ang tulo nila ka sunod-sunod nga pilde  pinaagi  sa  pagdaog   sa  higpit nga duwa batok sa Villalon, 85-78 sa LABA President’s Cup 2016 First Conference niadtong Biyernes didto sa Barangay Banilad gym, Mandaue City.

Agresibo pa kaayo ang Villalon sa pagsugod ug ila dayon nga gilat-an ang Monterroyo, 14-2 sa nahabiling 6:40 sa first period. Inay maluya, nadasig hinuon ang Monterroyo sa pakigbisog hangtod  midaog.

Nagmangtas si Michael Tañan, kinsa miiskor og 22 puntos ug adunay 13 ka rebounds aron pangulohan ang Monterroyo nga may purohan pang moabante sa sunod hugna nga aduna na’y 4-3 record.

Misalida sab si Richard  Jordan aron  moiskor og 16 puntos, lakip ang upat ka 3-pointers nga nakapalagsik  sa Monterroyo. Si Albert Ramos nga lig-on sab kaayo og depensa miabuno’g 12 puntos, samtang ang team manager nga si Dr. Raul Monterroyo miambit og 10 puntos, upat ka steals ug duha ka rebounds.

Ang Villalon maoy naglabaw sa first half, apan kalit nga nausab ang dagan sa duwa sa mosunod nga mga kuwarter diin sila na ang naggukod human mailog sa Monterroyo ang labaw, 55-54 sa nahabiling 4:48 sa third period.

Sa laing mga duwa, ang Lakers milubong  sa JJV, 100-78 ug gilubong sab sa RMB ang New Millennium Hardware, 88-70.

Ang mga duwa gidumala ni league commissioner Geryl Bukiron  sa abag ni Adie Cinco. (BANAT PALARO)