Almine Bayani sa EJ fitness gym
CEBU, Philippines - Naglumpayat sa kalipay ang EJ Fitness Gym human makaipsot sa kulbahinam nga duwa batok sa SSK Abelgas, 64-63 sa Bond of Masters Basketball League 3rd Conference niadtong Domingo sa gabii didto sa Alta Vista gym sa Pardo, siyudad sa Sugbo.
Si See Almine maoy nahimong bayani sa kadaugan sa EJ Fitness Gym pinaagi sa pagpasud sa iyang mahinungdanong puntos sa himalatyong segundos sa duwa.
Dumadaog na unta ang SSK Abelgas kay labaw sila og usa ka punto katapusang 15 segundos sa final period, 63-62. Dihang ball possession sa EJ Fitness Gym si Almine maoy midala sa bola ug sa nahabiling singko segundos milusot kini nga nakapadaog sa koponan.
Si Almine miiskor og 23 puntos aron pangulohan ang EJ Fitness Gym, gisundan ni Aldrin Abellanosa nga adunay 13 puntos.
Ang SSK Abelgas gipangulohan nilang Clifford Abelgas ug Echang Royeras sa ilang 15 ug 12 puntos matag usa.
Sa laing aksiyon, ang Barbeque Boss milubong sa Minute Burger, 75-60 alang sa ilang unang daog.
Si Jay-V Arradaza miiskor og 21 puntos, samtang si Ted dela Victoria mitampo’g 15 puntos alang sa maong kadaugan.
Gipangulohan sab ni Karlo Paraiso ang Minute Burger nga misansan og 11 puntos, samtang si Jets Melijor mibugha’g 10 puntos.
Ang liga nahimo pinaagi sa paningkamot ni Jun ‘Master’ Tan inabagan sa tanang miyembro sa Bond of Masters ballclub. Ang mga duwa gipadagan nilang Edwin Dejacto Sr., Edwin ‘Paw’ Dejacto Jr., Teddy Cabanada ug Timmy Inocian. (BANAT PALARO)
- Latest