MJ inside edge, lider sa ‘Bond of masters’
CEBU, Philippines - Nagkumboya’g 33 puntos sila si Ronnie Miscala ug Panot Villamor alang sa MJ Inside Edge nga mikulit sa ilang ikaduhang sunod-sunod nga daog pinaagi sa pagloglog sa Wellas Fresh Chicken, 61-52 sa nagpadayong Bond of Masters Basketball League 3rd Conference niadtong Biyernes sa gabii didto sa Alta Vista gym sa Pardo, siyudad sa Sugbo.
Sa kasamtangan, ang MJ Inside Edge temporaryong nagsolo sa liderato uban ang 2-0 win-loss record.
Si Miscala mikadlit og 17 puntos, samtang si Villamor mikulit og 16 puntos alang sa ilang koponan nga miposte og 17-10 nga bentaha paghuman sa unang 10 minutos sa duwa.
Naghuwaw ang iskor sa duha ka kampo atol sa second quarter diin ang MJ Inside Edge nalupig sa scoring sa Wellas Fresh Chicken, 5-6 nga maoy labing gamay nga nahimo sa usa ka kuwarter sa kasaysaysan sa liga. Apan namawi ang MJ Inside Edge sa second half aron ihawon ang Wellas Fresh Chicken.
Si JC Repunte mitusik og 23 puntos aron pangulohan ang Wellas Fresh Chicken nga nagtangag og 1-1 nga baraha. Si Opel Abellanosa mipugnit og 13 puntos sa maong kapildihan.
Sa laing duwa, si Marvin Muñoz miariya og 26 puntos aron mangu sa opensa sa Horizon Auto Parts nga mipilde sa Stickerworld, 73-67.
Sila si Aris Vilan ug Ebit Nadela mitampo’g 10 puntos matag usa alang sa Horizon Auto Parts nga adunay 1-1 nga baraha.
Ang Stickerworld nga wala pa katagamtam og daog sa duha ka duwa gipangulohan ni King Zianra, kinsa mitikdol og 15 puntos, gisundan nilang Henry Faustino ug Jun Faustino nga parehong mitimbre’g 12 puntos.
Ang liga nahimo pinaagi sa paningkamot ni El Presidene Jun ‘Master’ Tan inabagan sa tanang miyembro sa Bond of Masters ballclub. Ang mga duwa gipadagan nilang Edwin Dejacto Sr., Edwin ‘Paw’ Dejacto Jr. ug Teddy Cabanada. (BANAT PALARO)
- Latest