Dayon Enterprises misakmit sa kampiyonato sa Viva Forty Christmas League

CEBU, Philippines - Natuman ang pangandoy sa Dayon Enterprises & Printing Press nga mopatik og kasaysayan   dihang ilang gilabhan ang Blue Coast Laundry, 99-89  aron masakmit ang labing unang championship trophy sa 1st Viva Forty Christmas League niadtong Sabado didto sa Guadalupe Sports Complex, Cebu City.

Kuyaw kaayong nakaduwa si ‘El Presidente’ Allan Abella diin iyang gipabuhagay ang tanan niyang tinagoan nga abilidad aron moiskor og 16 puntos ug ingon man mangu sa scoring sa Dayon Enterprises.

Si Abella, kinsa maoy presidente sa Viva Forty ballclub ug sa Dayon Basketball Club, nakakuha sab og igong suporta gikan nilang Michael Granada ug Rene Tinapay nga parehong miambit og 12 puntos.

Laing tulo nila ka teammates ang nagkuridas og 10 puntos alang sa Dayon Enterprises nga naglumpayat sa kalipay human sa kadaugan.

Tulo lang ka players ang nakaiskor og double figures alang sa naparot nga Blue Coast Laundry. 

Gipangulohan kini ni Juanito Sasing  nga mikuso-kuso og 15 puntos, gisundan ni Franklin Aniñon nga miladlad og 12 puntos ug ni Ibo nga adunay 10 puntos.

Ang torneyo nagmalampuson tungod sa maayong pagdumala ni Allan Abella ug sa panagtinabangay sa mga miyembro sa Viva Forty ballclub.

Gipahibalo sab ni Abella nga ang Viva Forty Sinulog Cup gikatakdang sugdan karong Enero 27 diha sa Sacred Heart School old campus gym sa Gen. Maxilom Ave., Cebu City.

Puntos matag usa

Dayon Enterprises (99) – Abella 16, Granada 12, Tinapay 12, Torrepalma 10, Ybarita 10, Verano 10, Elizalde 9, Calonia 7, Limana 6, Tejano 6.

Blue Coast Laundry (89) – Sasing 15, Aniñon 12, Ibo 10, Lopez 9, Iligan 7, Labandero 7, Gabutan 7, Racho 5, Cabusas 4, Delda 4, Mabatid 4, Verano 4. (BANAT NEWS)