Ilailaha si Raul "Jancork" Cabahug, sa Mandaue naghatag og dungog

CEBU, Philippines - Kung makadungog gani kita aning apelyido nga Cabahug diha sa dakbayan sa Mandaue, duha lang ka butang ang dali natong mahinumdoman  kay kung dili siya usa ka politiko, seguradong usa siya ka basketball player.

Atong ilailahon kini si Raul "Jancork" Cabahug, ang 16-anyos nga high school player sa University of the Visayas (UV) Baby Lancers, ang sakop sa Mythical Five sa Cebu Schools Athletic Foundation, Inc. (CESAFI) high school division.

Si Cabahug nahimugso diha sa Mandaue kaniadtong Nobiyembre 16, 1998 ug siya maoy naigo nga junior sa iyang amahan nga si Raul "Corky" Cabahug ug junior sab sa iyang apohan nga si Raul "Boy Pukang" Cabahug.

Akong nahinabi si Jancork sa miaging adlaw ug medyo bullish and iyang gidak-on sulod sa korte, daw dili ako makatuo nga sukwahi sa iyang gidak-on, hinay kaayo siya'g tingog ug matinahuron nga ikasulti.

Nakuha ang iyang ngan nga Jancork pinaagi sa usa ka kumbinasyon sa iyang inahan nga si Janine ug amahan nga si Corky mao nga kini Jan-cork.

Ang iyang apohan nga si Eduardo "Eddieboy" Cabahug maoy labing orihinal ug labing maayong player sa mga Cabahug nga giilang legend sa UV nga kaniadto, giila pa nga Visayan Institute (VI) sa wala pa kini mahimong kolehiyo. Ang iyang uyoan nga silang Elmer "Boy" Cabahug ug Elder Cabahug nahimo sab nga player sa UV ug ingon man ang iyang amahan nga si Corky.

Atol kadto sa panahon ni Eddieboy nga napilde sa UV ang labing lig-on nga team sa Japan ang Waseda University niadtong 1957 diha sa UV gym. Player sab ang laing apohan ni Jancork nga si Atty. Cesar Cababug, ang amahan ni Boy Pukang.

Singko anyos pa lang kini si Jancork, nagsugod na siya'g duwa og basketball ug medyo paspas ang iyang pag-umento.Diha sa UV diin duna pa siya'y duha ka tuig isip high school varsity, usa siya sa labing mahayag nga bitoon og labing hait nga "offensive weapon". Usa siya ka natural big man nga dunay lihok sa ilawom, dunay bentaha sa rebounding, dunay maayong perimeter shot ug free throw, moigo sab gikan sa three-point territory ug ang labing importante, maantigo siyang modepensa.

Nagtungha sa elementarya si Jancork sa YKF international school didto sa Lapu-Lapu City ug nagpa-enroll sa UV sa high school dihang gi-agni siya ni coach Delfin Pepito, Jr, ang kanhi coach sa Baby Lancers ug karon team consultant.

Siya karon maoy gilauman sa mga Cabahug nga maoy mosunod sa lakang ni Boy Cabahug nga moduwa sa PBA sa umaabot nga mga adlaw ug mismo si Jancork nangandoy nga makaduwa sa PBA sukad pa kaniadto.

Palaran ang UV nga adunay batan-ong Cabahug kinsa nag-ambisyon nga mohatag og kampiyonato sa high school sa dili pa siya mobiya sa Sugbo. Si Jancork maoy captain ball sa Baby Lancers ug siya maoy leader sa team.

Daw mapugos og balhin ug tungha si Jancork sa Manila atol sa college kay karon pa lang gani, gisaaran na si Jancork nga paduwaon sa Ateneo ug sa La Salle University sa panahon nga mogradwar na siya sa UV. Matod pa ni Jancork nga moduwa na gyud gani unta siya sa Ateneo apan mibalibad siya kay adto man lang siya  ibutang sa Team B.

Ang iyang apohan nga si Boy Pukang kinsa maoy nagmatuto kaniya gikan pa sa unom pa lang siya ka buwan gikan sa pagkatawo, gusto nga adto si Jancork moduwa sa La Salle. Dili pa lang dugay human sa CESAFI junior finals, mibakasyon og upat ka adlaw silang Boy Pukang ug Jancork sa Manila niadtong Nobiyembe 14.

Samtang didto sa Manila mita-aw siya sa duwa sa PBA diin nagkahigalaay sab silang June Mar Fajardo ug Ronald Tubid. (BANAT NEWS)