Hawks midagit sa Knicks

CEBU, Philippines - Gipamatud-an sa Atlanta Hawks nga usa sila sa labing maayo’g teamwork sa NBA sa miaging season dihang ilang gibihag ang New York Knicks, 112-101 sa ilang duwa kagahapon didto sa Madison Square Garden sa New York.

Si Jeff Teague maoy nangu sa 1-1 nga Hawks sa iyang 23 puntos, samtang laing lima niya ka teammates ang mihimo sab og double figures. Si Al Horford miiskor og 21 puntos, si Kyle Korver miamot og 15 puntos, si Dennis Schroder  mitikdol og 13 puntos, samtang sila si Paul Millsap   ug Tiago Splitter adunay 11 ug 10 puntos matag usa.

Si Carmelo Anthony mao sab ang nangu sa 1-1 sab nga Knicks  nga mipabuhagay og 25 puntos, gisundan ni Robin Lopez nga midugang og 18 puntos, samtang ang Latvian rookie forward nga si Kristaps Porzingis ug Kyle O’Quinn parehong mitampo’g 10 puntos.

Init ang field goals sa Hawks diin mihimo sila’g 62 percent (8-for-13) gikan sa three point arc. Milabaw sila og maayo sa halftime, 61-45 kortesiya nilang   Horford ug Korver nga mihimo’g 12 puntos matag usa.

Namintinar sa Hawks ang ilang double digits nga labaw ug si Teague miposa’g sagunson nga 14 puntos aron inaton pa ang labaw ngadto sa 22 puntos, 79-57 sa nahabiling 5:42 sa duwa.

Sa lain pang mga duwa, si Marc Gasol miiskor og 20 puntos ug si Mike Conley miabuno’g 13 puntos ug 10 ka assists alang sa Memphis Grizzlies nga midaog batok sa Indiana Pacers, 112-103.

Pito ka players ang miiskor og double digits alang sa Grizzlies nga mi-outscored sa Pacers 18-7 sa katapusang 3:49 sa duwa.

Si George Hill mibahog og 20 puntos alang sa Pacers, samtang sila si Paul George ug C.J. Miles miamot og 18 puntos matag usa.

Midaog sab ang Los Angeles Clippers human ilang gilubong ang Dallas Mavericks, 104-88 didto sa Staples Center sa Los Angeles, California.

Si Blake Griffin mihimo’g 26 puntos ug 10 ka rebounds, samtang si Jamal Crawford midugang og 15 puntos sa maong kadaugan.  Si DeAndre Jordan adunay sayes puntos, 15 ka rebounds ug upat ka blocks sa una niyang duwa batok sa Mavericks   sukad   sa  iyang  summer misadventures sa Dallas.

Ang piangon nga Mavs gipangulohan ni Dirk Nowitzki, kinsa miiskor og 16 puntos.

Miduwa ang Mavs nga wala ang ilang starting guard nga si Deron Williams ug Wesley Matthews tungod sa injury.

Sa laing bahin, ang guwardiya sa Clippers nga si Austin  Rivers, anak ni  Clippers  coach Doc Rivers, gipamulta  og   P25,000   human   siya  manglabay og bangko nga nakaigo sa usa ka fan.

Ang NBA executive vice president of basketball operations nga si Kiki Vandeweghe mipahibalo sa maong  disciplinary action human sa hitabo diin midaog ang Clippers batok sa  Sacramento Kings sa iskor nga 111-104.