Orange, Maroon sud na’s Q’Finals sa Sunday Club Summer League 2015

CEBU, Philippines – Segurado na sa quarterfinals ang Orange team ug ang Maroon/Autoparts nga pulos midaog pinaagi sa overtime batok sa tagsa-tagsa nilang kaatbang sa SRP Sunday Club Summer League 2015 basketball tournament niadtong Domingo didto sa San Roque Parish gym sa Brgy. Subangdaku, Mandaue City.

Ang Orange miagi pa og double overtime una nila maangkon ang kutas nga kadaugan  batok  sa  Gray,  78-64, samtang ang reigning champion Maroon/Autoparts  nangayo pa og dugang singko minutos nga overtime pagpukan sa Violet, 57-55.

Sa ilang kadaugan, ang Orange ug ang Maroon nagsawo sa liderato sa managsama nilang 4-0 win-loss records.

Si Badiles mipaksit og 14 puntos aron pangulohan ang Orange, gisundan ni Richie Tecson sa iyang 12 puntos. Sila si Ohing Ortiz ug Dodod Colina nagkumboya’g 22 puntos, samtang sila si Gideon Ipili ug Tata Sharot nga maoy responsabli sa duha ka overtime mitampo’g nuybe puntos matag usa.

Ang naparot nga Gray gipangulohan sab ni Canjo  Echavez, kinsa mikamada’g 17 puntos ug  Romy Gastardo nga adunay 12 puntos.

Gidominar unta sa Gray ang unang-tulo ka kuwarter diin miposte sila og 18 puntos nga labaw paingon sa final period, apan wala makalahutay ang ilang kusog hinungdan sa ilang pagsugamak.

Sa laing bahin,  si  reigning MVP Benito Aton Jr. miiskor og 13 puntos alang sa Maroon-JIB Autoparts nga nakasungasong sa mga panghulga sa Violet. Samtang si Romeo Rosaroso mao sab ang nangu sa pilderong Violet sa iyang  13 puntos.

Human magtabla ang iskor, 49-all sa nuybe segundos sa duwa, may purohan pa unta ang Violet nga mokawat sa dihang ila  ang ball possession, apan naratol kini ug nakahimo’g turnover hinungdan sa overtime.

Puntos Matag Usa

Unang duwa:

ORANGE (78) – Badiles 14, Tecson 12, Ortiz 11, Colina 10, Sharot 9, Ipili 9, Camacaylan 6, Menaling 2.

GRAY (64) – Canjo 17, Gastardo 12, Marturillas 7, Obenza 6, Supangan 6, Labedila 4, Perez 4, Cajes 3, Castañeda 2, Enad 2.

Ikaduhang duwa:

MAROON (57) – Aton 13, Anghay 8, Aniñon 7, Cabunillas 5, Caballero 4, Colina 4, Labastida 2.

VIOLET (55) – Rosaroso 13, Dayanan 12, Sagayno 8,  Andrew 6, Gonzaga 4, Ramirez 2, Duhaylungsod 2, Barkly 2. (BANAT NEWS)