Red-RDC miangkon sa ikatulong dapit sa SRP Sunday Club Anniversary League

CEBU, Philippines - Gitugyan sa Red-SDC team ang ilang pagsalig ngadto kang Amay Dy atol sa second overtime aron mabitik ang dangog nga kadaugan batok sa team Violet.

Ang Red-SDC midaog human makaipsot sa double overtime batok sa Violet, 107-95 sa kulbahinam nilang sangka alang sa ikatulong dapit sa bag-o lang natapos nga SRP Sunday Club 6th Founding Anniversary League basketball tournament niadtong Domingo didto sa San Roque Parish gym sa barangay Subangdaku, Mandaue City.

Si Dy midul-it og 10 puntos sa second overtime alang sa kinatibuk-an  niyang 24 puntos aron pangulohan ang Red-SDC  nga makabangon gikan sa 16 puntos nga lubong sa halftime, 26-41.

Sakit kaayong palandungon ang maong kapildihan nga nahiaguman sa Violet kay duha ka higayon nga anaa kanila ang posisyon sa pagdaog sa dihang naglabaw sila sa himalatyong oras sa regulasyon ug sa first overtime.

Ang Violet abante og dos puntos sa hinapos nga bahin sa final period, 74-72, apan napatabla kini ni Hanzel Fick, 74-all hinungdan sa overtime.

Pabor na sab unta nga modaog ang Violet dihang igo lang milabaw og usa ka lugas ang Red-SDC, 86-87 sa nahabiling 11 segundos, apan napakyas gihapon sila dihang si  Romy Rosaroso igo lang mipasud og usa sa duha niya ka free throws nga naghatod sa duwa ngadto sa ikaduhang overtime.

Ning higayona, si Dy mibagnos na og maayo  ug gialalayan sab siya nilang Glenn Ramirez, Paul ‘Poy’  Miñoza, Niño Villarin ug Fick nga pulos naka-iskor og double digits sa maong duwa.

Si Ramirez mitikdol og 16 puntos, ang walay kukaluya nga si Miñoza mitimang og 14 puntos. Mitimbre sab og 13 puntos si  Fick, samtang si Villarin mihirit og 10 puntos. Ang 3-point shot ni Bernard ‘Gulfan’ Arreglo maoy hingpit nga mitak-op sa kadaugan sa Red.

Si Alex  Gonzaga mikabya’g 22 puntos aron maoy mangu sa Violet, kansang usa sa ilang sinaligan nga si Rosaroso naabtan og demalas sa ikaduhang overtime. Apan bisan pa niini, si Rosaroso  nakatampo gihapon og daku pinaagi sa iyang 19 puntos, gisundan ni Robert Sagayno  nga mikabkab og 14 puntos.

puntos matag usa

RED (107) – Dy 24, Ramirez 16, Miñoza 14, Fick 13, Villarin 10, Castro 7, Arreglo 7, Conahap 5, Colanse 4, Amora 3, Castañeda 2, Survilla 2.

VIOLET (95) – Gonzaga 22, Rosaroso 19, Sagayno 14, And. Auxtero 9, Colina 8, Carpina 6, Camargo 6, Adr. Auxtero 4, Pestaño 3, Gabison 2, Duhaylungsod 2. (BANAT NEWS)