Mabolo police nimasaker sa Sunday Club-A

CEBU, Philippines - Dili ikalalis, ang kapolisan tigpanalipod sa katawhan batok sa dautan, apan bangis kini  sa natad sa basketbol dihang ang Mabolo Police Selection walay puangod nga nimasaker sa SRP Sunday Club-A, 76-56 sa ilang exhibition game atol sa pagbukas sa Sunday  Club 8th Founding  Anniversary League niadtong Domingo sa buntag didto sa San Roque Parish gym sa barangay Subangdaku, Mandaue City.

Ang PNP-Mabolo ubos sa liderato nilang SPO1 Joel Pilapil ug SPO1 Arnold Aventajado naniid pa sa lihok sa nabaniog nga SRP Sunday  Club atol sa first period diin igo lang sila milabaw og dos puntos paghuman sa maong kuwarter, 17-15.

Diha na sila  namanhig sa second quarter sa troika nilang SPO1 Aventajado, Randy Jakosalem ug Hartzel Billedo aron bingaton ang labaw ngadto sa 12 puntos, 37-25 sa nahabiling dos minutos sa  dili pa ang halftime. Mihulga ang Sunday Club-A sa nanghinapos nga bahin sa maong kuwarter sa tandem nilang Alex Cabase ug Gideon Ipili, apan wala mosalir ang ilang mga paningkamot kay pakyas sila pagpugong sa mangtas nga PNP-Mabolo, kansang labaw miburot ngadto sa 28 puntos, 61-34 paingon sa final period.

Si Louie Tanggol maoy topscorer sa PNP-Mabolo nga mibanhig og 18 puntos, gisundan ni SPO1 Arnold Aventajado ug Jessie Berong nga adunay siyete puntos matag usa. Lain pang nakatampo sa kadaugan sa PNP-Mabolo  mao sila si SPO1 Joel Pilapil,, Venerando Bacalso Jr., Rusty Pelayo, Marlon Acabado ug Niko Gil Dagalea.

Ang napildeng Sunday Club-A gipangulohan nilang Eric Obra ug Alex Cabase nga parehong mikutlo og 12 puntos, samtang si Alex Abano mitampo'g 11 puntos. (BANAT PALARO)