Andam na ang RD 5 Keiz BJ Motors & Phoenix Cyclomax Titam moto-x

CEBU, Philippines - Plansado na ang tanan alang sa fifth leg sa Keiz BJ Motors and Phoenix Cyclomax Titan Invitational Motocross Competition nga mosikad karong Domingo didto sa Upper Pagsabungan sa Mandaue City.

Kapin sa usa ka gatos ka riders gikan sa Sugbu ug sa ubang dapit sa Visayas ug Mindanao region ang gipaabot mopakita sa ilang katakus ning usa ka adlaw nga kompetisyon.

"We're expecting a huge number of participants because it's been almost a decade since a motocross race has been held here. The Mandauehanons are really craving for this kind of event and I'm happy that we're able to do it," matud pa ni Keiz BJ Motors big boss Siegfred Ornopia atol sa press conference kagahapon didto sa Family Choice Restaurant sa Gorordo Avenue, ning siyudad.

Matud pa ni Ornopia, nga gidapit nila ang ubang mga bantugang riders aron molamas sa kalihukan nga naglakip ni RP No. 2 rider Dondon Yuson, Wilson Famorca sa Iloilo ug Fil-Am Remi Scott sa Dumaguete City.

Dili usab hinuon magpaiwit ang local riders nga andam na sa hugot nga kompetisyon sa expert division sama nilang Jonjon Adlawan, Pepo Rubi, Cyril Tariman, Wilbert Maraño ug managsuong Juvenelle ug Jovannie Abellar.

Ang garbo sa Pagsabungan nga si Brylle Ornopia modepensa sa iyang balwarte batok sa mga bisitang riders nga sila si Froilan Torralba, PJ Galla sa Maasin City, Andrei Gastador sa Daanbantayan ug JP Cuesta sa 85cc division, samtang ang iyang igsuon nga si Kenken mopakita sa iyang katakus sa 65cc category batok ni Mark Mendaros sa Talamban ug Peewee Galla sa Maasin City.

Ang kinamanghorang anak ni Ornopia nga si Keizer mopakita og aksiyon sa peewee division.

Lain pang mga kategoriya nga nalakip sa lumba mao ang intermediate, executive A ug B, local enduro, habal-habal selection limited edition ug habal-habal & wanggits showdown.

Aron maiganyo ang mga manan-away, si Ornopia mopa-raffle og usa ka brand new Yamaha motorcycle gikan sa mga sponsors.

Ang lumba gipaluyohan sab sa Phoenix Petroleum Phils. ug Haojue Phils. uban sa abag nilang Jun Mahusay, Reynante Tigue, WRW Enterprises ug Garris Chain.

Mipaluyo sab sila si Aki Montecillo, Engr. Juanito Gerona, RMO Motorparts, Jeffrey Basalo, Pagsabungan barangay officials ubos sa liderato ni Brgy. Capt. Andres Suson, Hon. Bubbles Suson, Major Philip Montejo, Doning Goc-ong Jr. ug Diamond Lumber ni Cebu boxing promoter Rex ‘Wakee’ Salud.  - BANAT NEWS