UV fighting spirit nakapadaog sa Baby Lancers

CEBU, Philippines - Sa katapusan, natambalan na gyud ang upat ka tuig nga kauhaw sa korona sa University of the Visayas (UV) Baby Lancers human nila nailog og balik ang juniors basketball championship sa Cebu Schools Athletic Foundation Inc. (CESAFI).

Usa sa nakanindot sa ilang kadaugan kay usa sila sa "underdogs" gikan sa pagsugod ug ilang napuhalan ang mga paboritong Cebu Eastern College (CEC) Dragons ug Sacred Heart School-Ateneo de Cebu (SHS-AdC) Magis Eagles.

Apan ang kasingkasing, pailob ug determinasyon maoy nagtukmod sa Baby Lancers pagkab-ot sa hagit ug nakapasurprisa sa tanan dihang ilang naangkon ang no. 1 spot sa elimination round.

Ilang gipilde ang University of Southern Philippines Foundation (USPF) Baby Panthers sa wala pa nila balii'g pako ang Magis Eagles sa "best-of-five" finals series.

Ang UV Baby Lancers katapusang nikampiyon niadto pang 2007.

"Words cannot describe how proud I am for this team. The moment we won the championship, I feel like a child all over again. I did not even think we would reach that far because we're the underdogs from the very start," matud ni UV Lancers team manager Gerald Anthony 'Samsam' Gullas Jr.

Agi'g pasalamat, ang pamilyang Gullas sa pagpangulo ni UV president Eduardo 'Eddiegul' Gullas midalit og "victory party" alang sa Baby Lancers kagahapon didto sa Cafe Marco sa Marco Polo Hotel. Ang tanang sakop sa koponan nakadawat sab og mga insentibo.

Mitambong sab sila si UV vice presidents for finance and administration Joselito 'Jiji' Gullas ug Gerald Anthony 'Didi' Gullas ug asawang si Ann-Ann.

Alang ni Delfin Pepito Jr., ang hardwork ug big fighting hearts sa iyang players nakatabang sa ilang kadaugan.

"Ang kakugi sa mga bata dako og natabang sa namo, (the hardwork of my players helped us a lot). That's why I have so much trust in them ," matud pa ni Pepito, kinsa mitimon sa UV Baby Lancers sud na sa 21 ka tuig.

Ang UV Baby Lancers gipalagpot sa ilang trono sa University of Cebu (UC) Junior Webmasters niadtong 2008. Nakasud sila sa finals sa 2009, apan napilde ngadto sa Cebu Institute of Technology (CIT) Wildkittens. Sa 2010 season, mikapyot sila sa ikatulo nga dapit. (BANAT SPORTS)