Anak ni Bobby Parks hinugot ng Smart Gilas para sa Youth Olympic Games

MANILA, Philippines - Matapos si four-time PBA Best Import Bobby Parks, ang anak naman nitong si Ray Ray Parks ang magpapakitang-gi­las.

Anak ng isang Filipina, pinili ng Samahang Basketbol ng Pilipinas (SBP) ang Fil-Am na si Ray Ray para sa three-on-three basketball team na lalahok sa Youth Olympic Games sa Singapore sa Agosto 15-23.

Makakasama ni Ray Ray sa koponan sina Jeron Teng, anak ni dating PBA power forward Alvin Teng, at Michael Tolomia, pamangkin ni dating PBA off-guard Chester Tolomia.

“We already decided on the lineup of our team in the YOG ex­cept one slot. They are Michael Tolomia, Jeron Teng and Ray Ray Parks,” wika kahapon ni SBP executive director Noli Eala.

Isang Filipino-American rein­forcement ang siyang ma­kakakuha ng pang apat at huling puwesto sa nasabing tropa, dagdag ni Eala.

“We’re reserving one slot for a guy named Rosner, a 16-year-old, 6-7 Fil-Am from In­diana discovered by coach Eric Altamirano,” ani Eala. “He’s very good according to Eric, with a body of Rafi Reavis and plays like KG Canaleta.”

Ang problema lang ay kung papayag si Rosner na maglaro sa YOG, ayon kay Eala.

“If the organizing committee agrees, we will bring him (Rosner) in, we might squeeze him in the last minute,” wika ng SBP official. “Hopefully we could get him to play in the YOG. If he’s not going to be allowed, we’ll probably get Michael Pate, who is also a member of the RP team.”

Ang RP Team na mamando­han ni dating La Salle standout Mon Jose ay kabilang sa Group D kasama ang Croatia, Spain, South Africa at US Virgin Island, habang nasa Group A ang Greece, India, New Zealand, Puerto Rico at Serbia at kagrupo ng Argentina at Iran sa Group B ang Egypt, Lithuania at Panama.

Nasa Group C ang Israel, Singapore, Turkey, the United States at kinatawan ng Central Africa.