Hawks dinagit ang Utah Jazz
SALT LAKE CITY — Nagsalpak si star guard Trae Young ng 27 points para banderahan ang Atlanta Hawks sa 115-108 pagdagit sa Utah Jazz.
Nag-ambag si De’Andre Hunter ng 26 points para sa Hawks (27-26), habang may 15 markers at 11 rebounds si Onyeka Okongwu at tumipa si Dejounte Murray ng 13 points at 8 assists.
Ito ang kanilang pangatlong panalo sa apat na road games.
Kumolekta si big man Lauri Markkanen ng 25 points at 10 rebounds para sa Jazz (27-27) at nagdagdag sina Fil-Am Jordan Clarkson at Mike Conley ng 24 at 20 markers, ayon sa pagkakasunod.
Malamya ang 3-point shooting ng Utah sa itinalang 13-of-44 clip laban sa Atlanta na itinayo ang 60-38 abante sa dulo ng second quarter mula sa isang triple at dalawang free throws ni Young.
Sa San Antonio, humakot si Joel Embiid ng 33 points at 10 rebounds sa 137-125 paggupo ng Philadelphia 76ers (34-17) sa Spurs (14-39).
Sa Minneapolis, umiskor si Cole Anthony ng 20 points sa 127-120 panalo ng Orlando Magic (21-32) sa Minnesota Timberwolves (28-27) kung saan limang players ang na-eject dahil sa rambulan.
Sa Boston, humataw si Mikal Bridges ng 25 points para sa 106-94 pagdaig ng Phoenix Suns (28-26) sa NBA-leading na Celtics (37-16).
Sa Washington, kumamada si Anfernee Simons ng 33 points sa 124-116 pagsapaw ng Portland Trail Blazers (26-26) sa Wizards (24-27).
Sa Detroit, kumonekta si Saddiq Bey ng 22 points para sa 118-112 pagtakas ng Pistons (14-39) sa Charlotte Hornets (15-39).
Sa Houston, nagpasabog si Fred VanVleet ng 32 points sa 117-111 pagsapaw ng Toronto Raptors (24-30) sa Rockets (13-39).
- Latest
