EDITORYAL - Taga media ba sab sila?

Sa wala pa mauso ang internet diin natawo kining gitawag og social media ug vlogging  sa mga tawo, bugtong sa mga sakop sa mainstream media lamang makuha ang mga importanteng impormasyon bahin sa palibot alang sa kasayuran sa katawhan.

Pinaagi sa radio, telebisyon ug mga pamantalaan mahatud ang mga balita, impormasyon, kasayuran ug mopadayag og mga opinyon ingon man pagpanaway sa mga kahiwiang binuhatan sa mga opisyales sa gobiyerno o mga impluwensiyadong mga tawo.

Ang mga tawong nangaylap ug naghimo aning maong mga impormasyon o balita mga reporters, kolumnista, komentarista nga duna taas kasinatian sa industriya. Inampingan ang dungog ug ilang pangalan apil na usab ang imahe sa media outfit diin sila nagalagad.

Pipila kanila ang gipatay ug dunay gipangkasohan sa mga tawong ilang gibirahan sa ilang mga artikulo. Kabahin kini sa risgo sa trabaho sa usa ka mediaman.

Apan sa pag-uso sa internet ug nakat-on na ang mga tawo sa social media ug karon vlogging, halos ang tanan pwede nang mangangkong sakop sa media kay lagi maka-post naman sila og bisan unsang ilang makita o makuhaan og hulagway o video.

Ang social media nakatabang pagsabwag sa balita o mga kasayuran kay halos tanang tawo duna nay access sa internet pinaagi sa ilang mga cellphones.

Apan apil sa gisabwag mga fake news, misinformation, disinformation ug tungod sa negatibong epekto ug pagtan-aw, pun-an pa ang pagkatapolan sa mga tawo pag-research o walay load ika-research aron maberipika ang balita kun tinuod ba, hasta ang lehitimo ug kredibleng balita sa mainstream media ingnon pud nga fake news kay wala mauyon sa kung unsa ilang gusto.

Gigamit sab ang social media sa mga influencers, political influencers, tigpakatap og fake news ug dunay uban mangingilad, ekstorsiyonista, ug daghan pang uban apan sila nagpakaaron-ingnong sakop sa media.

Ang pangutana, makonsiderar ba sab silang mga mediamen bisan wala silay media company nga gialagaran? Lahi man gud ang tratamento kun taga media ang nagbalita o nangomentaryo kun itandi sa mga tighatud og fake news, misinformation, disinformation o tsismis.

Maayo tingaling klaruhon ang kalainan sa “press freedom” o “freedom of the press” sa “freedom of expression” nga para sa tanan.