I-decriminalize na ang drug use

Niduso og balaudnon si Senador Ronald “Bato” Dela Rosa nga mag-decriminalize sa paggamit og illegal nga drugas aron maluag ang naghuot na nga mga prisohan. Sa iyang balaudnon, giklaro sa senador nga ang paggamit lang sa gidili nga drugas ang dili na ilhon nga krimen busa ang pagbaligya ug ang paghupot sa gidili nga drugas magpabilin kining krimin.

Ang senador mipasabot nga ang paggamit sa gidili nga drugas ikonsiderar lamang kini nga isyu sa panglawas ug dili isyu sa law enforcement.

Kun ang pagpaluag lang sa naghuot nga prisohan ang rason nganong i-decriminalize ang paggamit sa gidili nga drugas, maingon nato nga magdasig lamang kini sa mga adik sa pagpadayon sa ilang bisyo.

Ang criminal law adunay duha ka school of thought, ang classical ug positivist.

Sa classical, ang basihanan sa tulobagon sa krimen mao ang kagawasan ug kabubot-on sa tawo ug ang tumong sa pagsilot mao ang pagbawos basi sa gidak-on sa salaud o kasaypanan nga nahimo. Mao ni ang basihan kon ipahamtang ang silot kamatayon. Buot ipasabot ang nakapatay patyon pod. Pero ang naglugos dili poyde nga lugoson.

Sa positivist, ang tawo gikonsiderar nga usa ka social being diin ang iyang mga buhat ikonsiderar nga dili lamang bunga sa iyang kabubot-on kun dili bunga usab kini sa uban nga puwersa sa sociedad.

Tungod niini, ang silot dili sulbad kay dili man lang siya ang mabasol sa sala sa kinatibok-an. Busa ang balaud ug mga hukom sa hukmanan dili maoy himoong sukdanan sa pagpahamtang og silot kun dili ang mga nagpaluyong hinungdan nga kinahanglan nga pakisayran.

Kun ang positivist nga tiyorya ang anaa sa huna-huna sa senador, puwede nga eksperimentohan ang iyang gipalabang nga balaudnon. Ang ato lang kabalaka, dili kaha kini magbunga og pagsanay sa mga adik.