Pundo batok baha

Wala man direktang manghunaw og responsibilidad sa lunop nga nasinati sa dakbayan sa milabay'ng semana diin 60 porsiyento sa kabarangayan ang apektado, apan tataw nga buot basolon sa administrasyon ni Mayor Michael Rama ang mga niaging administrasyon.

Kini tungod sa kapakyas sa miaging duha ka administrasyon--Tomas Osmeña ug anhing Edgar Labella---pagsulbad sa problema bisan duna nay pundo nga gigahin sa iyang pamunoan niadto pang 2015.

Sigun ni Budget Officer Marieta Gumia dunay P1.3 bilyones nga gigahin si Rama niadtong 2015 aron pagpalambo sa drainage system sa dakbayan.

Apan wala mapatuman ang proyekto tungod kay napildi si Rama ni Osmeña niadtong 2016.

Dihang mibanos si Labella niadtong 2019 wala sab mahatagi og pagtagad ang pagpatuman sa proyekto tungod kay nasentro ang atensiyon sa administrasyon niini sa pagbatok sa pandemya.

Matud ni Gumia nga niadto pang 2015 dunay gahin alang sa drainage system apan hangtud ron wala pa maklaro ang implementasyon niini.

Gawas hinuon sa P1.3 bilyones nga gihisgutan ni Gumia, ang records sa City Hall nagpakita nga dunay mosumada og P100 million nga gahin alang sa flood control sukad niadtong 2010 hangtud sa 2014. Ang pangutana giunsa pagamit ang maong pundo nganong nagkagrabe ang baha nga nasinati sa dakbayan?

Dili kaha nahurot lang ang minilyon nga kantidad sa pagpatuman og band aid nga solusyon sa problema sama sa pagpanglimpiyo sa drainage ug kasapaan matagkaron ug unya inay nga mopatuman og mas malungtaron nga solusyon?

Dili kaha nahurot lang ang pundo sa pagpanuweldo sa mga job order employees nga ilang gihatagan og trabaho isip bayad sa pagpangampanya atol sa eleksiyon?

Sa ka lapad sa pagbaha nga nasinati sa dakbayan sa niaging semana, panahon na nga himoong prioridad sa mga opisyal sa dakbayan ang pagsulbad sa problema.

Ang pangutana unsa ka seryoso ang kagamhanan sa pagsulbad niini?

Kun basihan ang budget allocation sa kagamhanan sa dakbayan alang sa 2022, tataw nga di prioridad niini ang pagsulbad sa baha.

Di hinuon nimo mabasol si Rama niini tungod kay ang preparasyon sa budget karong tuiga gihimo niadto pang miaging tuig.

Sa annual budget karong tuiga way klarong gahin alang sa flood control ug drainage. Hinuon matud ni Konsehal Jerry Guardo adto nila kuhaon ang pundo sa 20 porsiento nga development fund nga mokabat gikan sa P400 ngadto sa P500 milyones.

Sa kadako sa panginahanglan angayang dunay lahi gyud pundo alang sa flood control projects.

Hinaut nga sa preparasyon sa budget alang sa sunod tuig mahatagan na og espesyal nga gahin ang pagsulbad sa mga pagbaha.