Angelica Lopez Bb. Pilipinas International 2023

CEBU, Philippines — Nagtubo siya sa kawad-on hinungdan nga sayo siya nahingkod. Aron makatabang sa iyang inahan nisalmot siya og beauty pageants diin ang premyo iyang isuporta sa panginahanglanon sa pamilya.

Sa edad nga 14, nakaplagan siya sa Elitista Circle of Models sa Palawan. Ang maong grupo gyud maoy iyang giisip nga nautangan og buot sanglit mao kini nagmatuto niya sa kalibutan sa modeling ug pageantry. Ang 22-anyos nga beauty-queen, second year student sa kursong psychology sa Palawan State University.

Gawas nga nisalmot siya sa Miss Universe Philippines 2022, nahimo sab siya nga pambato sa Pilipinas sa Miss Asia Global 2022 didto sa Malaysia, diin nitapos siya nga first runner-up. Ang pambato sa Thailand nga si Warapon Mae Yarbrough maoy rayna.

Alang kang Angelica, ang iyang inahan kinsa nipanaw upat ka tuig na ang nilabay, maoy iyang role model. Gani sa iyang tubag sa Q&A, iyang gihisgutan ang iyang inahan nga mao gyud ang nagtudlo niya aron magmalig-on, magmaisugon ug sa dili gyud pagsurrender sa mga pagsuway sa kinabuhi.

Advocacy na gyud niya ang magpahigayon og feeding program ug paghatag og gasa ngadto sa mga batang uyamot, sanglit nasayud siya unsa kalisod ang kinabuhi basi sab sa iyang kasinatian. Gani niadto eight years old pa lamang siya, gisaad niya sa iyang kaugalingon nga motabang gyud sa mga nanginahanglan kutob sa iyang mahimo.

A ug A ang mga rayna!

Ang mga pambato sa Palawan ug Bataan ang nidaog sa Bb. Pilipinas niadtong Domingo sa gabii didto sa Araneta  Coliseum.

Si Angelica Lopez, nga taga Palawan maoy gikoronahan isip Bb. Pilipinas-International, ug ang taga Bataan nga si Anna Valencia Lakrini, maoy Bb. Pilipinas-Globe.

Silang duha, dili na bag-o sa natad sa indigay sa kaanyag. Si Lopez katigi ni Miss Universe Philippines Celeste Cortes sa nilabay nga tuig diin nasulod siya sa Top 16. Si Anna, nisalmot sa Bb. Pilipinas 2022, diin nalakip siya sa Top 12.

Ang first runner-up mao si i Bb. #33 Katrina Anne Johnson nga taga Davao del Sur, ug second runner-up si Bb. #16 Atasha Reign Parani gikan sa General Trias, Cavite.

Adunay 40 ka mga kandidata ang nagtigi karong tuiga. Gikan sa maong gidaghanon, gidiretso kini’g iban, diin Top 11 ra ang gipili isip semi-finalist. Ang laing pito nga nasulod mao sila Bb. #11 Cabanatuan, Nueva Ecija – Kiaragiel Gregorio; Bb. #14 Albay – Jeanne Isabelle Bilasano; Bb. #15 Aklan – Jessilen Salvador; Bb. #29 Laguna – Trisha Martinez; Bb. #36 Hermosa, Bataan – Mary Chiles Balana; Bb. #38 Dinalupihan, Bataan – Lea Macapagal; ug Bb. #39 Bulacan – Lorraine Jara.

Best in Gown si Martinez, Best in Swimsuit si Lakrini, ug Best in National Costume si Bilasano.

Nilingkod isip mga hurado sila si Olympic gold medalist Hidilyn Diaz, William Vincent Marcos (anak President Ferdinand Marcos Jr.), Miss International 2022 Jasmin Selberg, Peter Zwiener (Wolfgang Steakhouse), Manila Mayor Honey Lacuna Pangan, ABS-CBN actor Piolo Pascual, socialite Small Laude, Anton San Diego (Tatler editor-in-chief), international award-winning actress Dolly de Leon, ug SB19 member Josh Cullen.

Sila si Miss Universe 2018 Catriona Gray, Miss Universe Philippines 2014 Mary Jean Lastimosa,ug Miss Grand International 2016 first runner-up Nicole Cordoves ang hosts sa Binibining Pilipinas 2023.

Guests ug performers sila si Vice Ganda, Darren Espanto, Miss International 2022 Jasmin Selberg, ug Alamat.

Nisamot kagubot!

Maldita si Moira. Maayo lang kun adunay kinahanglan kay espesyal kaayo ka para niya. Apan kun wala, i-seen ra imong mensahe. Ug ang sala ni Jason Hernandez, bana ni Moira, mao nga nitubay og extra service gikan sa usa ka masahista.

Kana, ug daghan pang chismis ang gi-marites sa composer ug kanhi higala ni Moira nga si Lolito Go.

Ikiha

Apan gihimakak kining tanan sa abogado ni Moira nga si Atty. Jojie Alonzo dungan sa pagbutyag nga ikiha ni nila ang composer nga si Go, gumikan sa mga bakak nga gipasiatab niini batok sa singer.

Sa usa ka Facebook post, niadtong Domingo sa gabii,  gibutyag ni Alonzo nga gipunayan niya og tambag ang iyang "celebrity client" sa dili na lamang pagkiha sa bana niini bisan tuod og aduna silay igong basehanan, hinunoa, ipunting na lamang nila ang atensyon sa gitakdang iduso nga "Petition".

Apan gumikan sa nigawas niadtong Domingo nga pasiatab pagguba sa imahe sa iyang kliyente pinaagi sa pagmugna og mga bakak, dili gyud nila kini palabyon. Kinahanglan niya pa nga manubag ang responsabli sa maong mga bakak.

Bakak!

Samtang gidipensahan ni Jeff Vadillo, Vice President sa Cornerstone Entertainment, ang ilang talent ug higala nga si Moira, batok sa pasangil nga 95% sa mga kanta niini, sinuwat sa iyang bana nga si Jason Marvin. Suma ni Badillo, collaboration ang nahitabo ug wala kini itago ni Moira. Pero sa maong collaboration mas daghan og tampo si Moira.

Supak sab siya sa giingong, giagni niini ang iyang kanhi higala aron mahimong "ghostwriter" sa mga kanta niini.

Matud niya, dayag na nga sa wala pa nisikat si Moira, nibugwak na kini og mga kanta, busa wala kini magkinahanglan og ghostwriter.