Warriors bangis nga mibawos sa LA Lakers

CEBU, Philippines — Si Klay Thompson miposa og walo ka tres sa iyang 30 puntos sa dihang gilat-an sa Golden State Warriors ang LA Lakers, 127-100, aron tablahon ang ilang best-of-seven NBA Western Conference semifinal series sa baraha nga 1-1 kagahapon didto sa Chase Center sa San Francisco, California.

Wala sab magpabitin ang alas sa Warriors nga si Stephen Curry nga mihipos og 20 puntos ug mipasa og 12 ka assists, nga maoy iyang labing daghan sa playoffs sukad niadtong 2014, ingon mn si Draymond Green na mipupo og 11 puntos, 11 ka rebounds, ug siyam ka assists.

Igo lamang mi-abante ang Lakers og siyete puntos sa unang kuwater, 33-26, gumikan kay mi-rally ang Warrriors aron ilogon ang labaw sa halftime, 67-56. Wala na sila molingi pa sukad niadto.

Sa kinatibuk-an, ang Golden State mi-iskor og 41 sa ikaduhang kuwarter ug dayon mibomba og 43 puntos sa ikatulong kuwater aron paburoton ang ilang labaw ngadto sa 30 puntos padung sa pinal nga 12 minutos sa aksiyon.

Si LeBron James nanginit sa sayong bahin sa duwa uban ang 14 puntos  apan midugang lamang siya og siyete puntos sa ikaduha ug dos puntos sa ikatulong kuwarter sa wala pa sila gipalingkod ni Anthony Davis sa katapusang kuwarter.

Si Davis, nga maoy ilang bayani sa Game 1, nalimitahan ngadto lamang sa 11 puntos ug pito ka rebounds sa pilderong Lakers.

Si Rui Hachimura mipaulbo unta og 21 puntos apan nakawang ang iyang paningkamot sa habig sa Lakers.