Dawata ang kamatuoran

Dear Tito Miguel,

Ako si Marian, taga Barangay Guadalupe, Cebu City. Naguol ko kay mas guwapa ang uyab sa akong ex-boyfriend. Unsay tambal sa akong pagka- insecure? Wala gyud ko kadawat nga mas nilabaw pa nako ang iyang present girlfriend. Maglagot ko maghuna-huna labi na ang among common friends kay permi mi ikumpara.   —Marian

Marian,

Lisod wagtangon ang insecurity kay nagtubod kini sa self-image sa tawo, kun unsa iyang tan-aw sa iyang kaugalingon ini’g panamin, pun-an pa sa mga insensitibo nga komentaryo sa uban. Kadagha’g guwapa ug sexy na kaayo, insecure lang gihapon. Duna sad mga apiki’g hitsura, feeling guwapa. Ang tanan naa ra sa atong utok, sa mata molusot. Busa usba imong mindset. Dawata ang kamatuoran nga duna gyud daghan molabaw kanimo, sama sa daghan sad ka’g malabwan. Undangi na’g kumpara sa imong kaugalingon ngadto sa laing tawo, labi na sa uyab karon sa imong ex. Ang pagkumpara maoy mohikaw sa imong kumpiyansa sa kaugalingon. Timan-i, wala kini mahimo pag-usab sa imo’g sitwasyon – nga buwag na mo sa imong kagahapon ug naa na siya’y karon. Naglungot-lungot ka kay nakigtigi’g kumpetensiya ka sa uyab sa imong ex. Gusto ka iproklama nga labing guwapa, wa man unta ka niapil’g paindigay sa kaanyag. Wala kini gamit sa imong kinabuhi o pag-asenso. Dili nimo kinahanglan pamatud-an nga ma’s guwapa ka sa uban, kay ang tanan depende ra sa nagtan-aw. Kasagaran bitaw morena gusto man moputi, apan ilang pamanit maoy kinaham ug gikasinahan sa mga langyaw. Depende ra gyud sa nagtan-aw.

Maski dili kaayo ka guwapa o madanihon sa imong panan-aw ug sa uban, pero sa tawo nga gitagana para nimo, wala na siya’y pangitaon pa kay ikaw tinuod niya nga hinigugma. Mao nay paabota. Pasagdi inyong common friends unsa’y isulti, lagmit common sad sila’g nawong. —Tito Miguel