Ayaw’g sumpay

Dear Tito Miguel,

 Ako diay si Ron, taga Busay, Cebu City. Akong problema karon kay ang batasan sa akong uyab nga si Jessa. Kun mag-away mi, iyang balikon og topic ang karaan namo nga isyu,like katung time nga nakasala ko. Nagbasol nako ana, pero magsige siya og balik . Unsa man akong buhaton Tito Miguel ? Salamat --- Ron

Ron,

Simple ra imong buhaton. Kun kada away ang nakaraan nga isyu iya gihapon kaykayon, ayaw’g tubag o sumpay. Hilom na dayon. Mangutana gyud na’g ngano, usahay mamugos pa nga mosukol ka, kay siya ang klase nga gusto pirmi  mapamatud-an nga siya insakto ug ikaw sad-an.

Ingna di ka mopatol sa mga isyu nga nahitabo kaniadto. Wala kay dag-anan, maski unsao’g hisgot o kawot, di na mausab ang inyong giagian. Gani, hasta siya di na modaog maski insakto iyang punto, tapos na inyong giawayan kaniadto. Ngano hisgotan o lalisan pa man? Wala nay gamit nga awayan pa ang dugay na nga gilubong sa panahon. Kun iya balik-balikon, buot pasabot wala pa siya kalimot o kapasaylo, pangutan-a ngano nagsige pa man mo?

Apan dili ba sad kaha nga iyang balikon ang  karaan kay sige sab nimo usbon sa kasamtangan? Kun mao, duna sad siya’y katarungan. Apan kun ang isyu karon wala’y kalambigitan sa karaan unya iya gihapon balikan, diha na ka mohilom. Kun mo-insistir gihapon, lakaw palayo. Ingna magkita lang mo’g balik kun ang hisgotan ang isyu karon, dili ang mga nangagi. Bahaw na, pan-os pa gyud.

Ingna nga kun gusto siya magdugay mo, buhian na niya’g kalimtan ang nahitabo kaniadto, kay mao ni mobira paatras sa inyong pag-abante ngadto sa inyong padulngan. Kon di mopatuo, ingna bahala siya kun gusto siya magpabilin sa kagahapon, ikaw na lang molakaw ngadto sa imong kaugmaon.   —Tito Miguel

Magpatambag ka? Ipada kang Tito Miguel: 0998-581-5856