RIP, Cherrie…

Nagbangutan ang tibuok showbiz industriya gumikan sa pagpanaw sa banggiitang aktres ug primera kontrabida nga si Cherrie Gil didto sa New York City niadtong August 5, gumikan sa cancer of the reproductive system. Singkwetay nuwebe si Cherrie. Ang iyang pag-umangkon ug award-winning actor nga si Sid Lucero maoy nikumpirma sa maong balita. Adunay duha ka mga anak si Cherrie sa kanhi niya bana nga si Rony Rogoff. Sila mao si Raphael ug Bianca.

Showbiz royalty si Cherrie. Anak siya sa mga artistang sila si Rosemarie Gil ug Eddie Mesa. Igsuon niya ang mga actor nga sila si Mark Gil (nga nipanaw niadtong 2014) ug Michael de Mesa. Ang unang pelikula ni Cherrie mao ang Beerhouse niadtong 1977. Siya maoy nagbatbat sa linya nga dili na gyud malimtan sa publiko nga mao ang, "You're nothing but a second-rate, trying hard, copycat!" atol sa confrontation scene nila ni Sharon Cuneta sa pelikulang Bituing Walang Ningning (1985). Lakip sa iyang mga markado nga pelikula ang Problem Child (1980), Manila By Night (1980), Oro Plata Mata (1982), Gaano Kadalas Ang Minsan (1982), Sana Bukas Pa Ang Kahapon (1984), Imortal (1984), God... Save Me! (1984), Sana'y Wala Nang Wakas (1986). Katapusan siyang nakita sa GMA7 series nga Legal Wives sa nilabay nga tuig diin kalit lamang siyang niundang ug nilupad paingon sa Amerika. — Gikan sa facebook