Carla ug Tom nagpakasal na!
CEBU, Philippines — Nanumpa na sa ilang panaghigumaay atubangan sa altar kaminyoon sila si Carla Abellana ug Tom Rodriguez niadtong Sabado.
Ang seremonya sa kasal gipahigayon didto sa San Juan Nepomuceno Parish Church sa Batangas.
Nikatap dayon sa social media ang mga hulagway sa bag-ong kinasal nga kuha sa wedding photographer nga si Pat Dy.
Ginama ni Monique Lhuillier ang bridal gown ni Carla , samtang si Francis Libiran usab ang nagmugna sa suit ni Tom.
Kahinumdoman nga nagkauyab sila si Carla ug Tom niadtong 2014. Samtang Oktubre sa miaging tuig sila na-engaged.
"Sa Haba Ng Gabi" nagkadoul
Mosikad na karong Oktubre 29 sa VIVAMAX ang horror-comedy film nga "Sa Haba Ng Gabi" ug gidalit kini sa Viva Films ug Reality Entertainment. Gibitoonan kini nila ni Candy Pangilinan, Jerald Napoles ug Kim Molina. Ang batan-ong direktor nga si Miko Livelo maoy nagdumala niini.
Nasayran nga nagsugod si Direk Miko isip motion graphics artist ug siya ang nagpaluyo sa pelikulang“Blue Bustamante” niadtong 2013.
Nakaangkon kini og international recognition sa Osaka Asian Film Festival niadtong 2014. Sa pikas bahin , naglawig na pud ang VIVAMAX sa Hong Kong, Taiwan, Thailand, Malaysia, Indonesia, Singapore, Japan, South Korea, Macao, Vietnam, Brunei, Maldives, Australia, New Zealand, Middle East ug Europe.
Yassi ug JC mopahilak sa viewers
Gipaabot ang paglutaw sa chemistry nila ni Yassi Pressman ug JC Santos sa Philippine remake sa Korean romantic drama film nga “More Than Blue”.
Ubos kini sa direksyon ni Nuel C. Naval ug makita sa VIVAMAX karong Nobyembre 19.
Napanglantawan ang pagtubod sa mga luha alang sa viewers niini gumikan sa makahilak nga mga eksena.
Nalakip pud sa maong proyekto sila si Diego Loyzaga ug Miss Universe Philippines 2013 Ariella Arida.
Ang More Than Blue kay South Korean drama classic niadtong 2009, ug nagmugna usab og version niini ang Taiwan niadtong 2018.
Dili proud sa iyang nabuhat
Giklaro ni Aljur Abrenica nga gihigugma gyud niya og maayo kaniadto si Kylie Padilla.
“I can still say na she was the love of my life. Talagang minahal ko ang babaeng iyon," suma pa ni Aljur atol sa presscon sa pelikula niya nga Manipula.
Aminado si Aljur nga duna siyay sayop sa dihang giatake niya si Kylie sa social media sa miaging semana kun diin gihagit niya ang aktres nga isulti sa publiko kun kinsa ang unang nagbinuang sa relasyon nila kaniadto.
Gitataw sa aktor nga dili siya proud sa iyang gibuhat . Gani iyaha na kini nga gipapas sa iyang social media account.
Giingong nahinaykan niya ang maong post gumikan kay wala na siya kaantos
“Well, I’m not proud sa nangyari. Ang reason why na nagawa ko iyon—out of impulse. Kasi I felt like nasadsad na ako. Natulak, lubog na ako. Nabugbog na ako,” niya pa.
Matud pa niya nga apektado gyud siya sa iyang gibuhat.
“I value our family more than anything. So, I was really affected nung nangyari iyon,” nagkanayon ang aktor.
Nagkanayon si Aljur nga dili na siya gusto nga mohatag pa og dugang mensahe kalabot sa away nila ni Kylie.
“She’s still the mother of my children. May pinagsamahan pa rin kami. I will never forget that. Pinagpapasalamat ko yon. Nasabi ko na lahat ang gusto kong sabihin. Hindi ko na siya gusto pang i-elaborate dahil pamilya ko pa rin sila,” panapos pa ni Aljur.
Mga lig-on nagtapok sa "Viral Scandal"
Istorya nga nag-ugat sa usa ka video scandal maoy bag-ong serye nga gidalit sa ABS-CBN Entertainment ug kini nag-uhan og "Viral Scandal".
Nasayran nga nagbaha ang mga banggiitang artista sa maong show. Gipangulohan kini nila ni Charlie Dizon, Dimples Romana, Jake Cuenca, ug Joshua Garcia.
Nalakip usab niini sila si Jameson Blake, Markus Patterson, Ria Atayde, Maxene Magalona, Aljon Mendoza, Karina Bautista, Louise Abuel, Kaila Estrada,Vance Larena, Gian Magdangal, Arielle Roces, ug Aya Fernandez.
Ang "Viral Scandal” makita sa umaabot nga mga adlaw sa Kapamilya Channel, TV5, A2Z, Kapamilya Online Live, iWantTFC, ug TFC IPTV.
Gary V naka-quarantine
Kasamtangang naka - quarantine ang singer nga si Gary Valenciano human nagpositibo sa RT-PCR test ang iyang drayber niadtong Sabado sa buntag.
Bisan pa man nga negatibo ang singer sa antigen test, boluntaryo siya nga mag-isolate hangtod sa Nobyembre 6.
Gusto lang ni Gary ug sa iyang handler nga maneguro.
- Latest