Ramirez: 50% ng monthly allowance ng mga national athletes, coaches maibabalik din
MANILA, Philippines — Hindi dapat manlumo ang mga national athletes at coaches dahil sa pagkakatapyas ng kanilang monthly allowance.
Tiniyak ni Philippine Sports Commission chairman William ‘Butch’ Ramirez na sa sandaling matapos na ang problema ng bansa sa coronavirus disease (COVID-19) ay kaagad na ibabalik ang kanilang monthy allowances.
“This is a hard decision to make, but one that needed to be done so we can continue caring for our athletes longer,” ani Ramirez matapos ang pulong ng PSC Board noong Biyernes.
Babawasan ng 50 porsiyento ang monthly allowances ng mga national athletes at coaches simula bukas dahil sa kinakaharap na health crisis ng gobyerno.
Nagmumula ang monthly allowance ng mga national athletes at coaches sa National Sports Development Fund (NSDF).
Hindi lamang ang mga national athletes at coaches ang apektado matapos tapusin ng sports agency ang kontrata ng mga sports coordinators, consultants at ilang foreign coaches.
Samantala, mag-iisyu naman ang PSC ng mga ID at isang booklet sa mga national athletes at coaches para makakuha sila ng 20% discount sa mga pagkain, gamot, recreation centers, hotels, lodging establishments at sports equipment purchases.
Ang pagbibigay ng 20% discount sa mga athletes at coaches ay nakasaad sa probisyon sa RA 10699 matapos maglabas ang BIR ng Revenue Regulation 13-2020.
- Latest
