“A Stronger Human Being”

MANILA, Philippines — “I believe in the impossible

If I reach deep within my heart

Overcome any obstacle

Won't let this dream fall apart

See, I strive to be the very best

Shine my light for all to see

‘Cause anything is possible

When you believe”

Mao kini nga mga linya nga gikan sa kanta ni Fantasia Barrino nga ‘I believe’ nga mao ang kanunay nga gibutang sa alimpatakansa 23- anyos nga usa na karon ka Registered Medical Technologist kinsa nahimong kabahin sa Sinulog Idol Season 10 nga mao si Jake Keanu Batiancela.

Suma pa ni Jake nga daghan ang mga imposible sa iyang kinabuhi nga nahimong posible tungod sa iyang pagtuo sa iyang kaugalingon nga makab-ot niya ang iyang mga pangandoy sa kinabuhi. Dugang pa niya nga ang mga panghitabo sa iyang kinabuhi nahimo sab kini nga posible tungod sa iyang dako nga pagsalig sa Ginoo.

Si Jake nga nagpuyo sa Brgy. Guadalupe, misaysay kabahin sa iyang kaagi una pa siya nahimong lisensyado nga Med Tech ug sa iyang kinabuhi ug sa iyang mga kasikas sa kinabuhi.

Damgo na niya ang mahimong usa ka doktor kaniadto. Iyang gihangad ang iyang half-brother ug ang iyang iyaan nga usa na karon ka propesyonal nga mga doktor. Matud pa niya nga gusto niya nga sundon ang mga lakang nila.

Gawas nga mahimong usa ka doktor, aduna gyu’y bug-at nga timbang sa iyang kasingkasing ang mahimong usa ka singer o usa ka performer.

Singko anyos sa dihang nabatyagan  na sa iyang pamilya nga maayo siya nga mokanta.

“Pirmi man ko pakantahon sa akong pamilya sa mga birthdays ug uban pa nga event. ‘Dancing Queen’ ug ‘Top Of The World’ kay mao ang pirmi ipakanta sa ako sauna kay taas-taas pa man og tingog ang bata ug mao sad ang ganahan na kanta nila”, saysay pa niya.

Matud pa niya nga walay nagtudlo kaniya og kanta.

“Siguro it runs in the blood na kay tigkanta sab akong parents labi na akong papa. Nagkat-on ra sab ko through watching reality shows like The Voice, American Idol, X-Factor, ug mga got talents nga shows,”dugang pa sa singer.

Sa pagtungtong niya og kolehiyo, mipaubos siya og voice lessons tungod kay tinguha niya nga mabaid ang iyang estilo sa pagkanta.

Dugang pa nga nagsugod na sab siya og salmot og mga kompetisyon sa tunghaan ug nahimo siya nga kampiyon niini.

Human niini, siya ang nahimong representate alang sa Interschool Vocal Solo Competition nga usa sa mga kompetisyon nga ubos sa CESAFI.

Human niini, mibalik siya sa paghatag og tumang atensyon sa iyang pagtungha.

“Kato nga mga panahon nga hagbong-hagbong akong mga grado sa exams nako sa third year. Ganahan na kaayo ko mo-give up pero akong gihunahuna nalang kay ang kahago sa akong mga ginikanan nga nagpaskwela nako ug naghatag nako ug nindot nga future”, asoy pa ni Jake.

Gipaningkamutan ni Jake nga mabawi niya ang iyang mga gagmay nga grado ug aron nga makapasar lang siya.

Dakong kalipay na lamang niya nga nakalingkawas siya sa maong kalisdanan. Daw naibtan og tunok si Jake nga nakagwadwar sa maong kurso apan dili pa didto natapos ang tanan gumikan kay padayon gihapon siya sa med school diin dinhi na masukod kun unsa kagahi ang usa ka binuhat aron lang nga makalampos isip doktor na gyud.

Matud niya, pinaagi sa pagkanta ang iyang mapakita nga talento. Gawas niana, kamao sab siya nga moarte. Gani, lakip siya karon sa Vaudeville Musical Theatre Company.

Dinhi mas napalambo ni Jake ang iyang katakus nga layo sa iyang kurso. Dinhi sab siya nakakita og luna aron nga mapabuhagay niya ang iyang musika ug ang talento nga usa sa gasa sa Ginoo ngadto kaniya.

“I wanna express myself pinaagi sa pagkanta”, pulong pa niya.

Mao nga sa dihang nasayran sab niya nga adunay kompetisyon nga “Sinulog Idol”, wala siya magduha-duha sap ag-apil.

“Niapil ko ani kay ganahan ko nga ma-prove nako sa akong self na kaya pud nako ang mga ingani nga mga butang and ma-improve sad nako akong kaugalingon”, suma pa niya.

Pakyas man ang labing una niya nga pagpaubos sa audition apan wala kini nahimong babag aron masuway sa laing mga hugna sa audition.

“Wala gyud ko nihunong. From 2016 to 2018, niaudition gyud ko until nakuha ko for this year sa   Top 12”, matud pa niya.

Wala siya makasabot sa iyang gibati sa dihang nakahibalo siya nga usa siya sa motigi sa maong kompetisyon karong tuiga.

“Grabe ang akong pagpaningkamot gyud kaayo for 3 years, ug nahitabo na gyud siya karon”, suma pa niya.

Sa pagpaubos sa Top 12 sa mga nagkadaiyang mga workshops, matud pa ni Jake nga daghan siya og gitiman-an alang sa kalambuan nga iyang buot makuha.

“Ang nagpabilin sa akong hunahuna ug kasingkasing kay ang katong about attitude which applies to almost all workshops. Attitude sa pagkanta, attitude sa unsaon ug convey sa proper message sa kanta sa audience, proper attitude sa unsaon og react or reply sa mga tawo sa social media. Since role models naman jud mi, dapat nindot nga influence among mahatag sa mga tawo and that starts with the right attitude”, explikar pa ni Jake.

Nagamit kini ni Jake ang iyang mga nakat-unan sa unom ka gabii nga iyang pagpakigtigi aron makakuha og pwesto. Alang kang Jake, Dako na kini nga achievement ug fulfilling na sab siya sa iyang parte nga motapos sa una pa ang katapusang gabii sa kompetisyon.

“Naa tanan emotions--- ang kakulba, kalingaw, kamaoy, ug uban pa pero it made me a stronger human being and it made me an even better performer and a professional singer/artist”, pagtapos pa niya.