Giunsa pagtuon ang Maharlika bill  

Sa ilang pagpresentar sa Maharlika Investment Fund bill, ang mga paryente ni Presidente Ferdinand Marcos nideklarar ini nga yawe sa paspas nga paglambo sa nasudnong ekonomiya. Nipasalig nga gitun-an nilang mga probisyon ug angayng aprobahan sa labing dali nga panahon.

Pero gikuwestiyon sa mga sakop sa Social Security System (SSS) ug Government Service Insurance System (GSIS) nganong ang kuwarta nga ilang hinagoan gi-apil sa Maharlika sa way pananghid nila. Sa usa lang ka pamilok, gitangtang sa mga tigpasiugda ang SSS ug GSIS gikan sa ilang gitun-ang mga tinubdan sa pundo.

 * * *

Bisan sa kadaghan sa dinalidali nga kausaban nga gihimo tungod sa mas daghang buslot nga nakit-an sa tinuod nga mga eskperto sa ekonomiya, giaprobahan sa mga kongresista ang Maharlika sud lang sa 17 ka adlaw.

Pero human sa pila lang ka adlaw, hinikalimtan nga napasar nang bersiyon sa House of Representatives ug nagpaabot na lang sa Senado, si Kongresista Joey Salceda nipahibawo nga gitangtang nila ang laing tinubdan sa pundo, ang Bangko Sentral ng Pilipinas (BSP), ug gipulihan sa mga dibidendo gikan sa mga korporasyon nga gipanag-iya sa gobyerno.

 * * *

Si Presidente Marcos ug ang iyang economic managers nga gipangulohan ni Finance Secretary Benjamin Diokno nikuwestiyon dayon sa labing bag-ong bersiyon sa Maharlika:

• Matod ni Marcos ang mga dibidendo sa Government Owned and Controlled Corporations (GOCC) gigahin na sa mga proyekto sa gobyerno ug di angayng hilabtan sa Maharlika; ug

• Si Diokno nipasabot nga mas lisod ang paggamit sa mga dibidendo kay kinahanglan pang usbon ang charters sa tanang GOCCs.

 * * *

Ang Senado gipaabot nga mohimo og mas maayong bersiyon kay sa nagkayamukat nga balaudnon sa House. Pero ang principal author nga si Senador Mark Villar igo lang nangopya hangtod sa kataposang tuldok sa karaang bersiyon sa House. Wa gani magtagad pagsusi sa bag-ong kausaban ni Salceda.

Bisan sa pasalig ni Senate President Migz Zubiri nga ang Maharlika morang magic --kon moginansiya molambo ang nasud ug kon maalkanse di maapektahan ang ekonomiya-- ang mga alyado sa administrasyon, silang Chiz Escudero ug Win Gatchalian, nikuwestiyon sa pipila ka probisyon, apil nang daghang exemptions sa mga balaod nga makahukas sa Maharlika ngadto sa mga sindikato ug money laundering.