Mga Miyembro sa urban poor nakabenepisyo sa Info Caravan sa Toledo

CEBU, Philippines — Kapin sa 200 ka mga miyembro  sa 31 ka urban poor (UP) Associations sa Siyudad sa Toledo  ang nakabenipisyo sa nagkadaiyang impormasyon ug mga serbisyo sa pito ka mga ahensya ug pipila ka institusyon .

Ang maong kalihukan gitawag og 1st Toledo City UP Pista Info Caravan nga nahitabo sa miaging adlaw.

Matud pa sa pangu sa Toledo City Community Affairs and Development Office (CAD) Division nga si Ferliza Calizar nga tumong sa maong kalihokan nga makabaton ang mga miyembro sa urban poor og tukmang impormasyon nga gamit kaayo sa tanang kasikas sa kinabuhi sa tawo .

Nahisgotan usab sa maong kalihokan ang “mental health and addiction” ug gidumala kini sa upat ka speakers gikan sa Safe Haven Recovery Services and Assisted Living.

Samtang ang Social Security System (SSS) nisaysay sa mga kaayohan nga makuha sa umaabot nga mga miyembro sa informal sector nga mokuha og social insurance.

Nipahigayon pud og on-site business name registration ang Department of Trade and Industry (DTI) Negosyo Center nga gipangulohan ni  Risa Rafols.

Nahisgotan ngadto sa mga partisipante ang mga kaayohan sa usa ka maayong entrepreneur ug ang pamaagi sa pagkuha og assistance sa gobyerno.

Nihatag usab og partisipasyon ang Cooperative Development Authority (CDA), First Consolidated Cooperatives - Tañon Seabords (FCCT) ug Celestial Meadows Developers Cooperation (CMDC).

Giabagan usab kini sa Presidential Commission for the Urban (PCUP) nga gidumala sa area coordinator nga si Ma. Llura Layon.

Gipaneguro gyud ni Mayor Marjorie Perales ug sa tanang konsehales sa Toledo ang pagpahigayon sa maong kalihokan sanglit naghatag kini og kauswagan sa urban poor sector. MEL (BANATNEWS)