Moderna vaccine darating sa Pinas sa Mayo o Hunyo

MANILA, Philippines — Sa Mayo o Hunyo 2021 darating sa Pilipinas ang unang batch ng bakuna na gawa ng Moderna, ayon kay Phl Ambassador to the US Jose Romualdez.

Ayon kay Romualdez, mayroon nang kasunduan tungkol sa bakuna ng Moderna at hinihintay na lamang ang suplay.

“We’ve already concluded the agreement, ‘yong supply na lang, we’re threshing out the supply kung kailan nila puwedeng i-deliver itong Moderna,” ani Romualdez.

Umaasa silang mangyayari ang unang delivery bago matapos ang Mayo o sa mga unang bahagi ng Hunyo.

Ayon pa kay Romualdez, nasa 20 milyong doses ng bakuna na gawa ng Moderna ang inaasahang darating sa bansa.

Halos kalahati ng nasabing bilang ay mapupunta sa pribadong sektor at kanilang mga empleyado samantalang ang kalahati ay mapupunta sa mga health workers at mga local government units.