Ang Pasko dili padaghanay

Dear Tito Miguel,

I'm Tess, a mother of two kids. Namarayeg akong mga anak nga magbutang nami'g christmas decors. Wala paman mi budget uy. Lisud pa kaayo mi financially. For you Tito Miguel, angayan pa ba gud ta magdecorate para sa nagsingabot nga pasko? Mingaw ug pobre man kaayo ta karong panahona, unsaon nato pagsugat meaningfully ang pasko? —Tess

Tess,

Dili kinahanglan mogasto aron iselebrar ang pasko. Mao ni nataligam-an sa mga kristyano, ang pasko nahimo’ng komersyalisado. Nisimang sa katuyoan ngano si Kristo gihimugso. Apan ang maong hisgotanan ato’ng ihatag sa simbahan kay sila dinhi maoy eksperto.

Bahin sa imo’ng mga anak, pasabta nga ang pasko dili lamang maselebrar sa dekorasyon, pagkaon ug mga regalo, kun dili sa pagbaton sa insakto’ng pamatasan ug paninguha nga sila mamahimo’ng gagmay nga Kristo.

Lisod kay di gyud malikayan nga sila maibog sa uban labi na sa mga silingan. Busa ayaw ihikaw kay ang mga bata mangita gyud na’g lingaw. Kun apiki pa sa budget, papaabota lang nga makaluag luag sa di pa moabot ang pasko. Gani, sayo pa kaayo, usa ra man unta ka adlaw ang pasko. Kun magsugod ka’g sayo, pabor sa duna’y negosyo. Ayaw panghuwam aron lang makapalit sa dili tanto’ng kinahanglan. Kay inay nga imo’ng mga anak makakita sa inyong tinuod nga kahimtang, sila imo’ng ihatod sa artipisyal nga dalan simang sa inyo’ng tinuod nga giagihan.

Bisa’g pandemya, angay gihapon mag selebrar sa adlaw’ng natawhan sa imo’ng gituohan. Gani, labi na taliwala sa pandemya aron kuyog ang pasalamat nga kamo luwas ug nagpabilin nga himsog ang lawas. Igo na kini’ng rason sa selebrasyon.

Likayi ang pagtandi giunsa pagselebrar sa uban kay matud pa sa desiderata, duna tuod kanimo ubos apan maski unsaon, duna gyud gihapon molabaw. Ang pasko dili padaghanay’g dekorasyon o pagkaon, apan sukod sa kalipay nga sa selebrasyon kuyog nimo imo’ng banay. Tito Miguel