Tito Miguel

Dear Tito Miguel,

I'm Pearl, 15 years old, online class student. Igo igo ra gyud ang sweldo sa akong parents para sa among panginahanglanon. Ang problema kay akong mama gastador. Magsige siya'g pamalit og dili essential. Mora'g mamatay siya kun dili siya ka shopping og mga walay kwenta.

Unya, kami sa akong brother daghan kaayo'g palitonon para sa among online class apil na internet load. Nya among mama sige la'g saad dili matuman kay gipamalit ra niyag pangarte niya. Among papa under sa among mama. Help!

Pearl

* * *

Pearl,

Istoryaha inyo’ng ginikanan unsa’y problema nila ug dautang epekto niini labi na sa inyo’ng pangeskuyla. Apan ingna inyo’ng inahan wala ninyo gihikaw ang kaniya makalingaw. Pero angay unahon ang batakang panginahanglan sa dili pa mamalit sa wa’y kapuslanan. Sa maong paagi tingali mahagit inyo’ng amahan nga mobarug para ninyo.

Kun dili maminaw ninyo, suwayi dangop sa inyo’ng lolo ug lola, o dili ba kaha iyaan ug uyoan sa iya’ng side aron siya matambagan.

Kun di mausab, mahimo sad ninyo isulti sa inyo’ng class adviser nga duna mo’y problema sa pamilya, apan ayaw iyagyag tana’ng detalye. Aron inig periodic grading diin sila makigsulti sa inyo’ng ginikanan, mahimo kini mahisgotan.

Lagmit masuko inyo’ng inahan ngano gipaabot pa sa eskuelahan, ingna napugos mo’g buhat kay sulod sa panimalay wala man mo gipaminaw. Siyaro’g dili pa makaamgo.

Apan kun dili gihapon ug apektado gyud inyo pagtuon, hulgaa moundang na mo’g eskuela aron makapatuyang siya o mobalhin mo sa inyo’ng mga paryente aron sila na lang kaninyo mopaeskuela. Kun kamo kasab-an o dapatan, isumbong sa barangay. Dugay na siya’ng niabuso, sa wa pag atiman ninyo ug kun imaltrato pa gyud mo.

Tito Miguel