Igaton nga bana

Dear Tito Miguel,

Good day! I'm Jen, legal age ug guwapo akong bana. Ako gyud nang isulti kay mao nay nakaingon nga ma-stress ko. Kuan man gud Tito Miguel, daghan kaayong mo flirt sa akong bana. Mura'g okay ra pud niya, mura'g giganahan ra pud ba.

Pero kun akong i-confront, igo ra siya moingon nga wala ra gyud kuno, overthinker lang gyud kuno ko, malisyosa. Dili siya kasabot nga dili ko komportabli, insecure ko ug akong instinct is telling me nga there is really something going on. Unsa man dapat akong buhaton?  —Jen

Jen,

Dunay tulo ka nag-unang pamaagi unsao’g dala sa lalaki iyang hitsura. Una kadtong mga feeling guwapo, apiki ang hitsura apan nisubwak ang kompyansa. Ubay-ubay ni sila apan dili apil imo bana kay maayo man kaha’g hitsura.

Ikaduha kadtong tinuod nga guwapo apan kalma lang dili hambugero, usahay gani wa kahibawo nga sila guwapo. Ikatulo kadtong kahibawo sila guwapo ug pahimuslan nila ilang hitsura. Sila maoy delikado kay ila kini gamitong alas nga baraha.

Dinhi imong bana nahimutang kay mosakay siya sa moduol niya ug tataw nga siya nalingaw. Sultihi siya sa makausa pa unsay imong gibati niini, nga unta iya kining undangon aron imong pagbati iya konsiderahon. Dili lisod kun ang paglikay iyang buhaton.

Human nimo’g sulti, pasagdi. Kay maski unsaon nimo’g pugong, posible sa imong atubangan mohunong apan kon wala ka unsa kaha iyang buhaton? Hasta ang mga babaye ayaw patoli kay kun imo kumprontahon mata’g usa kaniya moduol daghan ka’g mahimong kontra. Pila ray pag-ingon nila igo ra sila nag-storya walay malisya. Ang problema ang imong bana, masulbad lang kini kun siya mag-reporma. Kun para niya walay malisya, ingna kasagaran pagbudhi nagsugod sa storya. Apan ang imo ra gyud bana nakahibawo asa taman iyang buhaton.

Sa laktod, salig na lang niya aron magmalinawon imong hunahuna. Total sa storya ra man kaha. Apan kun para nimo nilapas na sa linya, iduso imong pagka-asawa. Badlonga dili lang kay wa ka kauyon kun dili mao nay sakto niya nga buhaton.   —Tito Miguel