TNT nakabawi, may purohan pa sa Top 4

CEBU, Philippines — Daw sa nakaigo og duha ka langgam gamit ang usa ka bato ang TNT Tropang Giga human sa 92-79 nilang kadaogan batok sa Meralco Bolts sa PBA Philippine Cup niadtong weekend didto sa AUF Sports Arena sa Angeles City, Pampanga.

Gawas nga mipakgang sa duha ka sagunson nilang pilde, ang Tropang Giga mipahayag sab sa ilang tsansa nga makasud sa Top 4 nga dunay twice-to-beat advantage sa quarterfinals human giinat ang ilang rekord ngadto sa 7-3.

Ang Sugboanong All-Star guard nga si Roger Pogoy maoy mibida sa Tropang Giga uban ang 27 puntos, walo ka rebounds ug tulo ka assists.

Nindot kaayo ang gihimong pagpamawi ni Pogoy nga mihipos lamang og 19 puntos sa miagi nilang duha ka kapildihan.

Dako sab og natampo si Jayson Castro nga mikadlit og 24 puntos ug ingon man si Rayray Parks nga miposte og double-double sa ikaupat ka sunod-sunod nga higayon sa iyang 17 puntos ug 11 ka rebounds.

Kon modaog ang Tropang Giga batok sa Rain or Shine Elasto Painters sa katapusang nilang duwa sa eliminasyon ugma, segurado na silang mosud sa Final 4.

Si Chris Newsome mikamada og 17 puntos, samtang sila si Cliff Bodge, Baser Amer ug Raymond Almazan nagkumboya'g 39 puntos alang sa Bolts, kansang duha ka daog nahunong.

Natagak sila ngadto sa 5-4 ug kinahanglan nga modaog og usa sa nahibilin nilang duha ka duwa aron moabante sa sunod nga hugna sa torneyo.