2 organizer ng NPA, 3 pa sumuko sa Quirino
SANTIAGO CITY, Isabela, Philippines — Limang miyembro ng Communist Terrorist Group (CTG) ng New People’s Army (NPA) na kinabibilangan ng dalawang organizer ang kusang nagbalik-loob sa pamahalaan matapos sumuko sa mga awtoridad sa Nagtipunan, Quirino, ayon sa ulat kahapon.
Ayon sa report sa tanggapan ni P/Brig. General Angelito Casimiro, regional police director ng Cagayan Valley, ang mga sumukong terorista ay itinago sa mga pangalan na alyas “Sario”, 58, at alyas “Juana Marie”, 72, kapwa organizer ng nasabing grupo kasama pa sina alyas, Sario, Dan Dan at Kidlat, pawang mga miyembro ng Kilusang Larangang Gerilya (KLG) na kumikilos sa nasasakupan ng Quirino at Nueva Vizcaya.
Isinuko ng mga rebelde ang 1-Garand rifle na may 19 na bala; 1-cal. 38 pistol na may tatlong bala; 3-rifle grenade; isang fragmentation grenade at bala ng M14 rifle.
Ayon kay Casimiro, naging maayos ang pagsuko ng mga rebelde matapos ang mainit na pagtanggap ng pinagsanib na pwersa ng 86th Infantry Battalion (IB) ng Philippine Army; Nagtipunan PNP at ang Quirino Provincial Mobile Force Company (QPMFC) sa Purok 2, Barangay Sangbay sa bayan ng Nagtipunan dakong alas-2:00 ng hapon kamakalawa.
Iginiit naman ni Casimiro na mabibigyan at makakatanggap ng kaukulang tulong ang sumukong mga rebelde sa pamamagitan ng programa ng gobyerno para sa mas mapayapang pamumuhay.
- Latest