Lalaki sa India, namatay sa kagat ng pukyutan habang kini-cremate ang asawa

MARAMI ang hindi makapaniwala sa naging dahilan ng kamatayan ng isang lalaki sa India. Kinagat ito ng mga pukyutan habang ang bangkay ng asawa nito ay kini-cremate.

Isinasagawa umano ang pag-cremate sa bangkay ng asawa ni Jaam Singh Girdhan Barela, 50, ng Madhya Pradesh, India nang biglang mabulabog ang mga pukyutan at sinalakay ang mga sumasaksi sa pag-cremate.

Si Jaam na noon ay nagsasagawa ng rituals ang napagtulungan at napuruhang kagatin ng mga pukyutan na naging dahilan ng kamatayan nito. Nadala pa umano sa ospital si Jaam subalit dineklarang dead on arrival.

Ayon sa mga nakasaksi, habang isinasagawa ang pag-cremate sa asawa ni Jaam, ang usok mula sa crematorium ay napadpad sa punongkahoy na kinaroroonan ng bahay ng pukyutan.

Nabulabog ang mga pukyutan at sinalakay ang mga sumasaksi sa cremation.

Nagtakbuhan ang mga tao maliban kay Jaam na noon ay nagsasagawa ng ritwal habang sinusunog ang asawa.