Dili angay ikasakit

Grabe nga nakarebenta si Mayor Tomas Osmeña niining dakbayan sa Sugbo sa deklarasyon ni Philippine National Police Director General Oscar Albayalde nga pabiling hotspot ang Sugbo sa negosyo sa gidili nga druga.

Nakapangutana si Osmeña ngano nga ang Sugbo lang ang gigisa nga nag-unang lugar diin naghitak ang druga. Matud niya, matag lugar hotspot sa ilegal nga druga, ug dinhi lang sa Sugbo diin daghan ang nasakmit nga drugas sa mga otoridad.

Hinoon, dili lang si Albayalde ang mideklara kabahin sa grabe nga negosyo sa druga dinhi. Hagbay ra nga giyawyaw ni Presidente Rodrigo Duterte nga nag-una ang Sugbo sa mga lugar nga adunay dako nga presensiya sa shabu ug uban pa.

Gani, dugay ra nga gibaharan sa presidente kadtong giingon nga mga nalambigit sa maong negosyo nga wala na silay kapaingnan, kondili, ang ma-huwes de kutsilyo.

Hinuon, daghan sa mga dagkong personalidad sa nasud nga nalambigit kuno sa druga nia man nakabase sa Sugbo.

 Apan dili ikalimod ni Osmeña ug ubang miyam-id sa deklarasyon nga grabe gayud ang paghitak sa druga dinhi sa Sugbo. Dili nila ikalimod nga adunay ebidensiya ang otoridad nga makasuporta usab sa ila nga deklarasyon.

Tungod lagi kay matag adlaw kining mga operasyon sa otoridad diin dagko nga kantidad sa druga ang nasakmit, nagpasabot lang nga hotspot gayud ang lalawigan sa Sugbo sa maong ginadili nga negosyo.

 Ug nagpasabot lang usab kini nga kugi gayud ang kapolisan ug ubang ahensiya dinhi sa ilang operasyon batok sa druga. Ang binulto nga shabu nga nasakmit halos matag adlaw, timaan lang nga higpit gayud ang kampanya sa otoridad dinhi.

Wala man siguroy ikasakit ang atong mga lokal nga opisyal sa maong pamahayag ni Duterte ug Albayalde. Sa akong nakita, nagsulti lang sila sa tinuod taliwala niining daghang druga nga nasakmit niining gihingusgan nga krusada.

Angay pa man gani kita nga magpasalamat sa kapolisan ug ubang ahensiya sa ilang abtik nga pagsanong sa direktiba sa presidente pagpakusog sa opensiba batok sa druga.

Kay kining mga druga nga nasakmit naghatag lang og senyales ngadto sa mga nalambigit nga maabtan ra gayud sila sa mga kamot sa balaod sa dili madugay.