Nahutdan sa bakuna sa rabies

Niadtong Lunes, naabtan nako ang taas nga linya sa mga tawo sulod sa Lapu-Lapu City Health, nagsagol lang ang mga dagko ug mga bata, nga magpabakuna og anti rabies vaccine human mapaaki sa iro ug iring.

Adunay bata nga gihangkab sa iro ang kamot, may tigulang babaye nga napaakan sa itoy ang iyang tiil ug nahadlok kay namatay man ang itoy nga nakapaak kaniya, ug nagbinhod na ang iyang tiil.

Sa kahadlok, midangop sila sa city health. Gusto sa taga city health nga alagaran silang tanan, apan nahutdan na sila og bakuna sukad pa niadtong Mayo.

Ang shortage sa anti-rabies vaccine dili lang sa Lapu-Lapu, kon dili, sa tibook rehiyon kay walay supply nga gipadala gikan sa DOH-central office.

Ang gihimo sa mga health offices, sama sa Lapu-Lapu City, igo ra gyud sila makahatag og resita aron makapalit og bakuna sa botika ang mga napaakan.

Nihit sab ang mga bakuna sa botika ug mahal pa gyud. Kadtong walay kwarta, ihumol na lang tingali nila ang resita sa tubig aron maoy tumaron pangontra sa rabies. Pastilan, mao man gani nga midangop sa gobiyerno ang mga tawo kay wala silay ikapalit, apan mag-unsa man sila kon ang gobiyerno nahutdan sab?

Matud sa usa ka health personnel sa Lapu-Lapu nga sila mismo magdugo ang kasingkasing nga magsud-ong sa mga tawo nga mopauli nga wala gyud mabakunahi, apan igo na lang sila sa kalooy. Ang suliran sa panglawas, ilabi na sa isyu sa rabies, mahinungdanon kaayo nga matutokan kay delikado kaayo kini kon dili madali. Dili mahimo nga iunya-unya lang ang mga napaakan sa iro kay sa higayon nga magpositibo sila sa rabies, mahimo silang mamatay.  Nagkadaghan karon ang kaso sa mga tawong napaakan sa iro nga dili mahimo ibutang lang sa marka bahala, dili mahimong ipahulat og taas nga panahon.

Apan bisan unsaon nato pagmatngon, kon ang mga pet owners mas grabe pa ka rabid kay sa ilang iro, kay iresponsable kaayo ug gipatuyangan lang ang ilang hayop nga maglatagaw nga makapaak na hinoon sa mga tawo.