EDITORYAL - Maghimo ta og landfill

Angay gyud nga maghimo ang kagamhanan sa Dakbayan sa Sugbo og kaugalingong landfill nga atong kalabayan sa mga basura aron nga makadaginot ang siyudad sa gastohan.

Tinuod nga dako kaayo ang gastohon sa pagtukod og landfill, apan mas dako pa gyud ang kantidad nga magasto sa dakbayan kon padayon ra kini nga adto molabay’g basura sa private landfill.

Pagka karon, subra sa P300 milyones ang magasto sa kagamhanan sa Dakbayan sa Sugbo sa tibuok tuig sa paghipos lang sa atong mga basura. Pagka karon, duha ka kontrata ang gisudlan sa dakbayan sa paghipos sa mga basura.

Gipresentar sa mga opisyal sa Dakbayan sa Sugbo nga dili takus ang mga garbage truck sa Department of Public Services (DPS) nga mohakot sa atong mga basura gikan sa lainlaing barangay, aron dad-on sa gitawag og transfer station diha sa Barangay Inayawan.

Tungod niini, mi-hire ang City Hall og mga garbage truck nga motabang sa mga trak sa basura nga iya sa dakbayan sa Sugbo ug sa kabarangayan ning dakbayan, paghakot sa mga basura paingon sa Inayawan.

Gikan sa Inayawan, ang siyudad mi-hire na usab og service provider aron maoy mohakot sa mga basura paingon na sa pribadong landfill nga nahimutang sa lungsod sa Consolacion ug Aloguinsan.

 Kon ang siyudad sa Sugbo migahin pa unta og igo nga kantidad ug naghimo’g kaugalingong landfill, dayon mamalit og mga garbage truck nga makahakot sa atong basura, menos ra gyud unta ang kantidad nga gastohon sa dakbayan. Kinahanglan nga hinuktokan kini pag-ayo sa atong mga opisyal sa siyudad.