Alab Pilipinas peligrong matagak
CEBU, Philippines – Nabutang karon sa delikadong sitwasyon ang Alab Pilipinas human sila napilde sa Game 2 sa Mono Vampire Thailand, 100-103 didto sa kaugalingon nilang balwarte sa Sta. Rosa Sports Complex sa Laguna.
Mahinungdanon unta ang maong daog alang sa Alab ilabi na nga motapon na didto sa Thailand ang Game 3 ug Game 4 sa ilang ‘best-of-five’ ABL finals series.
Kini nagpasabot nga kinahanglan modaog og kaduha ang Alab didto sa balwarte sa mga Thai aron masakmit nila ang korona.
Doble demalas ang natagamtaman sa Alab tungod kay nakaangkon og seryosong injury sa Game 2 ang ilang sinaligan nga si Justin Brownlee. Si Brownlee nga wala katiwas sa duwa mitapos og 14 puntos ug layo ra sa iyang 46 puntos sa Game 1.
Usa sa problema sa Alab mao ang 7-foot-5 giant sa Mono Vampire nga si Sam Deguara nga miiskor og 30 puntos, samtang ang laing import nga si Mike Singletary mirehistro og 26 puntos.
Namuntos sa Alab si Renaldo Balkman sa iyang 37 puntos, samtang si Ray Parks Jr. adunay 21 puntos.
Ang Game 3 himuon karong Lunes sa Bangkok Stadium.
- Latest