Incinerator

Dili kaayo daghan og kuwarta ang Cebu City government ug maong naguol ko nga kon adto hakota sa Aloguinsan ang mga basura sa siyudad, dako kaayo ang gastohon nato sa paghipos lang sa mga basura, ug apektado ang ubang giplano nga proyekto nga makahatag og kaayohan sa katawhan.

Wa pa ko masayod kon pila ang kontrata sa Cebu City government ngadto sa mga private haulers nga mohakot sa atong mga basura kay pwerteng layoa sa Aloguinsan nga tua mahimutang ang San Rafael Landfill Corporation nga gipanag-iya sa banay’ng Moreno.

Kon dako man ang nagasto sa siyudad sa Sugbo sa pagpahakot sa mga basura paingon sa pribadong landfill diha sa lungsod sa Consolacion, ug bisan na gani kaniadto diha sa Barangay Binaliw, halos pilo-piloon kini kon adto sa Aloguinsan dad-on ang mga basura.

Pagkakaron, wa kita’y mahimo kay unsaon, human nga gipasirad-an sa DENR ang landfill sa Barangay Binaliw nga nakasinati og pagdahili ug nakakalas og 37 ka kinabuhi, ang siyudad sa Sugbo mihangyo nga adto lang usa sa Consolacion molabay sa atong basura.

Apan gitugotan lang ang siyudad nga makalabay og mga basura sa Consolacion landfill kutob sa buwan sa Marso, apan wa gani maabti og Marso kay wa na kini modawat sa mga basura gikan sa siyudad sugod sa miaging semana.

Kini maoy rason nga si Cebu City Mayor Nestor Archival napugos pagdesider nga adto na lang kita molabay og basura sa Aloguinsan, usa ka lungsod sa western Cebu nga 58 kilometros gikan dinhi sa siyudad.

Tungod niini, nakaingon ko nga nindot ang hukom ni Cebu City Vice Mayor Tommy Osmeña nga mosagop na lang kita sa paggamit og incinerator aron gamiton pagsunog sa atong mga basura. Ang tinuod ang ubang malambuon nga mga nasud, sama sa Japan, migamit man og incinerator paghipos sa ilang mga basura.

Unsaon man gud nga dinhi sa atong nasud, dunay may mga environmentalist nga mobabag niining maong paagi sa paghipos sa basura ug daghan sab nga katawhan nga misuporta sa pagsupak bisan og wa sila makasabot.

Ang ilang trabaho mao ra ang paggunit-gunit og mga placards ug magsinggit-singgit, apan kon pangutan-on dili makahatag og tukma nga pagpasabot nganong misupak sila.

Bisan gani ang gitawag og Waste to Energy (WTE) nga gisagop usab sa ubang kanasuran, duna sa’y misupak. Sa mga nasud nga nag-operate og incinerator ug WTE wa may daghang nangasakit nga maoy gikabalak-an sa mga tawo.

Unta, si Osmeña maninguha gyud niini, una pakigsabot ni Mayor Nestor Archival, ug magtinabangay sila pagpangita’g paagi nga ang kadagkoan sa kagamhanan mouyon sa maong tinguha.