EDITORYAL - Wala magtuyok sa tensiyon sa WPS
Nagtinguha karon ang Pilipinas nga makaagni og dos milyones ka mga turista gikan sa China kun mahinayon ang planong
pagtangtang sa limitasyon sa paghatag og tourist visas sa nasud sumala pa sa Department of Tourism.
Apan kining tinguha sa DOT mag-agad sa pagsanong sa Department of Foreign Affairs nga maoy tig-isyu niining visa sa mga
buot mosuroy dinhi sa nasud.
Ang China nga adunay populasyon lapas usa ka bilyon usa sa mga naapil sa dunay labing daghang turistang mosuroy dinhi sa
nasud. Hinuon wala pa sila makalabaw sa mga Koreano nga maoy number 1 tourist arrivals dinhi sa nasud.
Kung dili palang tungod sa tension sa West Philippine Sea sa pagpangilog sa China sa mga teritoryo sa Pilipinas, tingali mas
daghang mga turista gikan sa maong nasud ang magsulod-gawas dinhi ug magdala kini og kalamboan sa ekonomiya.
Dili ikalimod nga sa kadako sa ilang populasyon dako gyud ang merkado sa China ug ang tinguhang dos milyones ka Chinese
tourist nga mobisita sa Pilipinas dili imposibleng kab-uton.
Komplikado lang gamay tungod aning tension, apan naa na sa DOT kun unsay ilang buhatong mga pamaagi aron pag-agni pa og
daghang turista gikan sa maong nasud.
Pagkatinuod, gamay rang Pilipino ang mangadto og China isip turista, kadaghanan nangadto didto aron manarbaho.
Samtang bali sab ang sitwasyon nilang mga Chinese sa ilang pag-anhi dinhi, negosyo ug turismo ang kadaghanan sa rason
nganong nia sila dinhi ug pipila lamang nila ang nanganhi aron manarbaho sama sa mga nanarbaho sa nagkadaiyang online
casinos.
Ang relasyon tali sa Pilipinas ug China wala magtuyok sa isyu lang sa WPS, dunay maayong relasyon ang duha sa natad sa
ekonomiya ug negosyo, environmental concerns, edukasyon, agrikultura, siyensiya ug sa enerhiya ug daghan pang uban.
Samtang wala pay nahitabong giyera, maayong ipadayon kini mga kooperasyon sa duha sa nagkalain-laing kalihokan tungod kay
makabenepisyo gyud ang duha ka nasud gikan niini. Posible pang tungod niini malikayan ang giyera diha sa South China Sea.
- Latest