Pangilad ang pakyas nga bakak

Taliwala sa nagpadayon’g tensiyon dala sa giingon’g pagpanghilabot ni Mayor Michael Rama sa pagdumala sa Board of Directors sa MCWD, mipasalig ang kadagkoan sa maong ahensiya nga magapadayon ang ilang sebisyo ug dili kini mabalda tungod lang sa politika. Bisan wala pa ang maong kasungian tali sa mayor ug sa MCWD Board Chairman, aduna na ma’y suliran sa suplay sa tubig. Ginaingon baya nga “walay labing dakong pagpangilad nga molabaw pa sa napakyas nga saad”. Hinaut nga dili himoon’g sandiganan sa MCWD ang panultihon nga, “Ang napakyas nga saad dili pagatawgon nga bakak.”  Hala no!

HANGGAW ANG MANGHULGA

Gihimug-atan ni Presidente Ferdinand Marcos, Jr ang paghatag of hingpit nga suporta sa modernisasyon sa Armadong Kusog sa Pilipinas uban ang pagmando sa military pag-focus sa atong external defense. Luyo ni’ng pamahayag, wala isalindot sa Presidente ang pakighigalaay sa atong mga silingan’g nasud.  Adunay hulga ang pamahayag sa Presidente apan gibawi gilayon nga higala kita kanunay sa silingan nga nasud. Angayan gayod magma-inampingon ang Presidente sa iyang pamahayag kabahin sa hisgutanan sa WPS kay ginaingon baya nga “Hanggaw lang ang manghulga ug hanggaw lang usab ang madala’g hulga.”  Muleeng!

“CAUSE OF ACTION”

Walo na ka abogado sa Public Attorney’s Office (PAO) ang gipatay sa milabay nga 19 ka tuig tungod lang sa giingon’ng “conflict of interest,” butang nga gikasagmuyo sa hepe niini nga si Atty. Persida Rueda-Acosta.  Mahitabo ang “conflict of interest” kon ang abogado sa PAO magka-atbang paglaban sa mga kihante sa kaso nga pulos modangop sa ilang buhatan. Makapahinumdum sa komedya-estorya kabahin sa abogado nga sa dihang gipangutana ngano’ng gisang-at niya ang kaso bisan wala kini tataw nga hinungdan o “cause of action,” yano ra nga mitubag pag-ingon, “Kana diay’ng “acceptance fee” nga P100,000, dili diay na balido nga “cause of action?” Fezteleern!

GIPAKASLAN BISAN GADAPLAK

Segun sa survey sa Social Weather Stations (SWS) niadtong Marso, 69% sa mga Pinoy ang naglisod pagpanarbaho karong panahona. Dugang pa sa SWS, nahitabo na kining kahimtanga sukad pa niadtong tuig 2011.  Nalakip nga rason sa kalisod pagpanarbaho ang paghimong kwalipikasyon sa gitas-on ug kaambongan/kaanyag sa aplikante.  Apan dili lang magsubo ang mga bati’g nawong kon dili makatrabaho kay matud pa sa kanta ni Yoyoy Villame, “Ang mga bati’g nawong magpailob lang una…kay bisan gani kadto’ng ang mga nawong gadaplak, sa Amerkano gipakaslan man dihadiha”. Pagkatoytoy!

KAKULANG SA MAGTUTUDLO

Giangkon ni DepEd-7 Director Salustiano Jimenez ang kakulang sa mga magtutudlo sa mga tulonghaan sa Rehiyon 7 apan mipasalig siya nga naatiman ra gihapon ang mga tinun-an bisan sa maong kakulangon.  Matud sa director, ang labing dakong hinungdan sa kakulangon sa magtutudlo mao ang nagkadako usab nga populasyon sa mga tinun-an. Mora’g gipadayag ra man ni Director Jimenez ang tataw. Kay daghan man ang tinun-an busa moresulta gayod kini sa kakulang sa magtutudlo.  Haum ni’ng pamahayag sa DepEd ang panultihon nga, “Sa matag kumplikado’ng suliran, adunay tubag nga tataw, yano ug sayop.” Madahaan!