Inday milihay

May huhungihong. Si kanhi presidente ug karon Kongresista Gloria Macapagal Arroyo (PGMA) nagplano kuno nga mopasiugdag kudeta sa Kongreso.

Kay gustong pulihan sa puwesto si House Speaker Ferdinand Martin G. Romualdez.

Unya kon siya nay ma-House Speaker, mao na poy iyang ipakudeta si Presidente Bongbong Marcos (PBBM). Ug mahulipan ni Vice President Sara ‘Inday’ Z. Duterte-Carpio. Hinungdan, nga gitangtang si PGMA sa iyang pagka-Deputy Speaker of the House of Represenatives. Hinuon, gihimakak kini ni PGMA.

Apan ang nakapakurat mao: Ang pagbulag ni VP Inday sa Lakas-Christian Muslim Democrats (Lakas-CMD) isip tsirman, pinaagi sa usa ka irrevocable resignation tapos mataktak si PGMA sa pagka-Deputy House Speaker, kinsa President Emerita sa Lakas-CMD, nga maoy naghiusa nila ni Inday ug BBM panahon sa kampanya ug may dakong natabang sa ilang pagdaug.

Sa maong resignation letter ni Inday, iyang giklaro nga bisag miresayin na sa LAKAS-CMD, pabilin iyang pagpakighiusa ni PBBM diha sa ilang pagpangalagad sa katilingban. Pero may kabahin niini nga nagdalag halawom nga mensahe. Ania:

“I am here today because of the trust of the Filipino people in me to lead and serve them and the country. And this cannot be poisoned by political toxicity or undermined by execrable powerplay.”

Dinhi makita unsa kadako ang gugma ni Inday sa pagpangalagad sa katawhan ug sa atong nasud.

Puno kini sa katarong, kaligdong ug kalig-on nga dili matarog sa kahugaw sa dula sa politika. Sa laktod, dili siya madiktahan ni bisan kinsang haria. 

Tingale, may namatikdan si Inday sulod sa Lakas-CMD. Nga bisan layo pa ang 2028 presidential election, may napilian na silang himoong standard bearer? Ug dili si Inday.

Busa, husto ra iyang pagbiya sa maong partido aron malikayan ang pagpanagbingkil pag-abot sa panahon.

Humot si Inday sa katawhan. Gituman niya unsay iyang gisaad panahon sa pangampanya. Wala niya pakyasa ang 32 milyones kaping botanting mipadaog niya. Kon sa miaging 2022 nga piniliay, layo pa gani aduna nay mga grupong nagsabasaba-parada sa kadalanan: “Run, Sara, Run for President!” Samot na unya sa 2028?

Rason, nganong milihay si Inday niining mga kasikas nga nahitabo sa Lakas-CMD.

Dili siya gusto maapil sa kinanaas. Total, ang katawhan man maoy tinuoray niyang partido.