Nibalik ang mga kriminal

Mibalik na usab ang problema sa kahusay ug kalinaw sa dakbayan sa Sugbo niining panahona. Sa niaging mga semana, daghang taho sa social media mahitungod sa pagsiaw na usab sa mga pagpanulis ug uban pang krimen sa siyudad.

Gawas sa naandang negosyo sa illegal nga druga nga mora’g walay kasulbaran, uso na usab kining mga riding-in-tandem nga pagpanulis, pagpanglabni ug uban pa nga nakahatag na gayud og dakong kabalaka sa katawhan ning dakbayan.

Niadtong panahon sa administrasyon ni Presidente Rodrigo Duterte, nihit ang mga pagpanulis ug pagpanglabni sa siyudad. Hinuon dili lamang sa dakbayan sa Sugbo kondili sa tibuok nasud tungod kay nahadlok lagi kining mga kriminal nga matipi.

Gani kaniadto ang downtown area ilabina sa Colon Street, nga maoy kasagarang salag sa mga bugok sa katilingban, malinawon na kini tungod sa gipahugtang police visibility panahon sa rehimen ni Duterte.

Apan karon misiaw na usab kining mga sagbot sa katilingban. Akoy naluoy nga nagtan-aw niadtong usa ka batan-ong babaye nga nagkadugo ang nawong human kini gihapsan sa pistola sa usa sa mga lalaki nga mitulis kaniya diha sa Barangay Mambaling.

Ambot unsay estratehiya sa kapolisan batok niining nagkaseryosong problema sa kahusay ug kalinaw ning dakbayan. Hinuat nga kon unsa ka bangis ang mga nagpahiping kriminal, mas bangis usab ang kapolisan paggukod kanila.

Gusto kitang mamahimo pareha sa Singapore ang dakbayan sa Sugbo sa natad sa ekonomikanhong kalamboan ug kalimpiyo. Apan mora’g nalimot ang kadagkoan ug ang kapolisan sa dakbayan sa aspeto sa peace and order.

Didto sa Singpore, ilang gipanghuwis de kutsilyo ang mga kriminal mao nang hibalihan ka malinawon ang maong nasud. Mao usab unta kini ang angay buhaton dinhi sa dakbayan sa Sugbo. Wala ko magpasabot og extra-judicial nga paagi. Ang akong gusto mao ang pagpakusog sa presensiya sa otoridad ug ang daling pagresponde sa mga krimen.