Sihag ang motibo

.Angkonon man o dili ni Cebu City Mayor Michael Rama apan dili matago ang pagsihag sa tinuod nga hinungdan nga politika ang maoy motibo sa iyang tinguha pagpalagpot ni Atty. Joey Daluz isip chairman sa Metro Cebu Water District (MCWD) board.

Matud ni Rama way politika sa iyang disisyon nga hulipan si Daluz sa negosyante nga si Mike Pato. Duha ka rason ang gitug-0an ni Rama nga hinungdan.

Una, kinahanglan kuno niya ni nga buhaton tungod kay gipugos na siya sa Ombudsman nunot sa reklamo sa kapin sa 300 ka mga empleyado sa MCWD.

Ug ikaduha, wala na siyay pagsalig ni Daluz ug aron masiguro nga dili maproblema ang syudad sa supply sa tubig sa higayon nga

moigo ang El Niño kinahanglan siyang hulipan.

Taphaw ang maong mga hinungdan. Una lugar, wala may mando ang Ombudsman niya nga tangtangon si Daluz tungod sa reklamo sa mga miyembro sa union sa MCWD.

Igo lang giduso sa Ombudsman ang reklamo ngadto sa iyang buhatan ug giawhag siya nga aksiyonan ang reklamo. Sa rason nga nawad-an na siya og salig kay way klarong plano si Daluz unsaon pagtubag ang epekto sa El Niño, wala man tingali malilong ni Rama ang mga proyekto sa MCWD pagpalambo sa supply sa tubig.

Gani bag-o pa nga nagsugod sa operasyon ang Lusaran Bulk Water Supply nga nakatabang pagpalambo sa serbisyo sa water district.

Kun way politika niini, sulagma ba lang nga una niyang gitangtang ang asawa ni Daluz isip officer-in-charge sa DMDP? Resulta na ba kini sa gihugonhugon nga si Daluz interesado nga mopapili pagkamayor sa umaabot 2025 nga eleksiyon? Hinaut dili gamiton sa mga opisyal sa dakbayan sa politika ang serbisyo sa tubig.

Hinaut panaminan ni Rama ug sa ubang mga opisyal sa dakbayan ang gidangatan sa ubang mga politiko kaniadto nga gihimong hinagiban sa politika ang serbisyo sa tubig. Kaluoy sa Ginoo sagad sa maong mga politiko pulos na lawos ug wala na igdungog karon.