Atong hustisya tuyatuya

Ang balaod gipanday sa nasud aron maoy sundon sa tanan niining katawhan. Ang makalapas silotan. Mao nga sa dili pa sugdan ang imbestigasiyon sa korte, pahuraron gyod sa husgado ang imbestigahonon pinaagi sa pagpa-isa sa iyang kamot dungan ang pag-ingon: “I do solemnly, sincerely and truly declare and affirm that the evidence I shall give shall the truth, the whole truth and nothing but the truth.”

Ug mao kini ang gibuhat ni kanhi Bureau of Corrections (Bucor) Chief Rafael Ragos dihang mitestigo siya batok ni kanhi Senador Leila de Lima, kinsa sugod Pebrero 2017 napriso sa kasong illegal drugs nga kalihokan, diin si Ragos mitug-an, nga siya mismo ang mihatod-tunol sa P10 milyones drug money for Leila ngadto sa drayber niini nga mao si Ronnie Dayan.

Si Leila, kinsa nakuhaag video footage nga nakigsayawsayaw ug nakiglingawlingaw pa sa mga iladong bigtime drug lord inmates sulod sa National Bilibid Prison panahon sa pangagamhanan ni ex-President PNoy Aquino, mipasangil nga gigukod-kontrahan kuno siya sa miaging administrasiyon ni kanhi Pangulo Rodrigo Roa Duterte (PRRD), hinungdan sa iyang pagkabilanggo.

Apan dihang gipulihan na si PRRD ug si Presidente Bongbong Marcos nay milingkod sa Malakanyang, diin ang dinagkong suliran sa illegal drugs mibaha pag-ayo kay ultimo mga opisyales sa kapolisan namatud-ang nahilambigit ning maong sindikato, nausab ang kolor sa testimoniya ni Ragos.

Sa bag-ong affidavit ni Ragos, siya mipahayag nga napugos ra kuno siya pagduot ni Leila tungod kay gipiit-gihadlok kuno siya ni kanhi Justice Secretary Vitaliano Aguirre II. Pero hugtanon kining gihimakak ni Aguirre.

Gumikan niini, naabsuwelto si Leila sa ikaduha niyang illegal drugs nga kaso. Nga nakapadismaya sa kinabag-ang nagsunod sa maong kaso

Kay sa unang imbestigasiyon, nanumpa baya si Ragos nga pulos tinuod ray iyang isulti. Unya nganong gibag-o man iyang testimoniya nga pabor na ni Leila? Mao pay midaog!

Dili ba ang pag-usab sa unsa nay unang napanumpaan usa man ka pagpamakak ug puwede makasohag perjury ang namakak?

Pero, hayahaya nila ni Ragos ug Leila, sa? Sila pay gipadaog sa Regional Trial Court Branch 204 sa Muntinglupa City. Mao nga daghang nakaingon: “Atong balaod, tuyatuya! Anaay mahimutang sa itaas, aduna poy mahipunta sa ubos. Dili patas!