Operation naa nay chance

Human gihulipan ni Mayor Mike Rama ang tanang personahi sa Operation Second Chance, gitahasan sa Mayor si Cebu City South District Councilor Francis Esparis sa pagtutok sa mga kausaban nga ipatuman sa nahisgotang pasilidad.

Si Konsehal Esparis mao ang tsirman sa Committee on Social Services sa Konseho diin konektado niini ang Department of Social Welfare and Services nga maoy gitahasan sa pagpadagan sa Operation Second Chance. 

Sa tulomanon nga Saksi Evening Edition sa DySS Super Radyo GMA, gitug-an ni Konsehal Esparis nga gisugdan na karon ang pagpatuman sa mga kalihokan nga hinay-hinay nga makapausab o makapatul-id   kun dili man sa hingpit sa mga bata ug batan-on nga mga nakalapas sa balaud nga anaa sulod sa pasilidad.

Sa pagkakaron ang mga Children In Conflict with the Law (CICL) dili na sila kaon ug tulog sulod sa pasilidad. Anaa na silay makalingawan. Aduna na silay kalihokan nga makapalambo sa ilang pisikal ug ispiritohanong panginahanglan. Gawas niini, ipaubos na usab sila sa skills trainings agi og pagpangandam alang sa ilang panginabuhian, Alternative Learning System (ALS) ug ingon man paugnat sa kusog.

Kun matuman kining tanang kalihokan dako ang purohan nga ang masulod sa operation second chance anaa na unyay second chance.

Wala masayop si Mayor Mike Rama sa pagsangon ni Konsehal Francis Esparis nga maoy motutok sa Operation Second Chance.

Wala pa seguro ko makaila ni Konsehal Esparis sa hingpit pero ang akong nailhan kaniya, man of action siya ug dili molunga sa iyang himuon kun dili kini mahuman. Klase sa opisyal nga mora’g dili bati-on og kakapoy kun hisgotan na ang pagpangalagad sa katawhan ug sa mga nanginahanglan.

Ang dakong hagit karon sa konsehal mao ang resources nga magamit sa pagpatuman sa mga kausaban nga ipatuman sulod sa pasilidad nga gipangulohan karon ni Portia Basmayor.

Makaluya baya sa kaikag sa pagtrabaho ang kakuwang sa resources.